Dat sot eisen Invité vun der Redaktioun, de Steve Heiliger, Generalsekretär vun der Staatsbeamtegewerkschaft CGFP.

D'Staatsbeamte kruten zanter 5 Joer keng Erhéijung vum Punktwäert méi. De Punktwäert ass den Indice, deen d'Paien an d'Renten determinéiert. Bei de Verhandlungen ëm en neie Gehälteraccord, déi ustinn (de leschten Accord leeft Enn dës Joers of), fuerdert d'Staatsbeamtegewerkschaft CGFP elo awer eng Erhéijung. De Generalsekretär vun der CGFP, de Steve Heiliger, huet déi Fuerderung e Freideg de Moien hei op RTL verdeedegt.

Hien huet drun erënnert, datt d'CGFP am Joer 2018 am Austausch fir d'Ofschafe vun de reduzéierten Ufanksgehälter (80/80/90), aus Solidaritéit mat deene Jonken, op méi Sue verzicht huet. Dann och op en Neits virun zwee Joer, wéinst der Pandemie.

"Lo ass et awer mat der Solidaritéit fäerdeg", esou de Steve Heiliger. De CGFP-Generalsekretär huet deklaréiert, et géing eng gutt Aarbecht an der Fonction publique geleescht ginn "an da kënnt de Moment, wou och d'Leit aus der Fonction publique soen: 'Mat Applaus geet et awer net méi duer'". Op d'Remark, datt den Applaus wärend der Pandemie fir d'Fleegepersonal gemengt war, huet de Steve Heiliger geäntwert, datt d'Staatsbeamten och vu ville Plaze fir hir Aarbecht gelueft gi wieren.

Ëm wéi vill Prozent d'Paie fir d'Fonctionnairë sollen eropgoen, wollt de Generalsekretär vun der CGFP net soen. Doriwwer géing een als CGFP net op der Place publique schwätzen. Et géing een och am Géigesaz zum OGBL, dee 5 Prozent fuerdert, keng Zuel nennen. De Steve Heiliger sot awer vun der CGFP wäert eng "raisonnabel Fuerderung" kommen. Et géing een am Interêt vun de Membere vun der Gewerkschaft handelen, mee et géing och den Interêt vum Land kucken.

Ass et vertrietbar, an Zäite vun héijer Inflatioun, ekonomeschen Onsécherheeten an enger héijer Staatsschold méi ze froen? Op déi Fro huet de Generalsekretär vun der Staatsbeamtegewerkschaft geäntwert, datt ee keng Glaskugel hätt. Mä et wier net fir d'éischt, datt d'Situatioun duerno net esou schlëmm wier, ewéi ufanks erwaart.

Bei enger Punktwäerterhéijung kritt all Karriär, onofhängeg also vun der Héicht vum Salaire, déi selwecht Hausse. Genee ewéi beim Index, an dat soll och esou bleiwen, esou de Steve Heiliger. Fir d'CGFP géing een d'Ëmverdeelung iwwert d'Steiere maachen.

Eng einfach Upassung vun de Barèmen un d'Inflatioun géing awer och besonnesch déi héich Gehälter entlaaschten. Dowéinst huet de Steve Heiliger follgend Pisten erwäänt: d'Besteierung kéint bei méi héije Revenuen ufänken ewéi elo a bei den héchste Revenue kéint een och iwwert nei Tauxe beim Spëtzesteiersaz diskutéieren.

Invité vun der Redaktioun: Steve Heiliger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.