D’Kris um Logementsmarché mécht sech an de Staatsfinanze bemierkbar.

Dat weisen déi aktualiséiert Zuelen, déi de Finanzminister Gilles Roth e Freideg den zoustännege Chamberkommissioune virgestallt huet. Bis Enn Oktober ware ronn 205 Milliounen Euro un Enregistrementstaxen erakomm.

Staatsfinanzen - De Reportage vum Michèle Sinner

Dozou seet de Sven Clement vun de Piraten: "Kloer ass, datt mer beim Enregistrement eng immens Baisse gesinn. Iwwer 50 Prozent bis Enn Oktober, wou et natierlech dramatesch ass."

Dat läit dorun, datt manner Wunnenge verkaf goufen, erkläert de Finanzminister Gilles Roth.

"Et gëtt ronn 4.300 Akte manner déi gemaach goufe bis den 31. Oktober."

D’Lescht Joer waren em déi nämmlecht Zäit 421,5 Milliounen Euro d’Taxe d’enregistrement erakomm. Manner Venten an trotzdeem bleiwen d’Präisser vun den neien Appartementer héich. Dofir fäert den David Wagner vun déi Lénk:

"Datt d’Politik vun der Regierung, déi justement op d’Demande axéiert ass, datt déi wäert an eng Sakgaass féieren."

Trotzdeem, an trotz engem Abroch vun der Taxe d’abonnement op den Investmentfongen em 71 Milliounen Euro sinn d’Recetten alles an allem am Verglach mam Virjoer awer em 7,2 Prozent an d’Luucht gaangen, op 20,7 Milliarden Euro.

D’Ausgabe sinn ënnert anerem wéinst de Krisemesuren an de Gehälterupassunge beim Staat awer däitlech méi séier geklommen, nämlech em 15,4 Prozent op 21,4 Milliarden Euro. Den LSAP-Deputéierte Franz Fayot verdeedegt deemno d’Politik vun der leschter Regierung.

"Sou datt mer awer och an engem schwierege Joer 2023 ‘on track’ sinn, fir de Budget vun 2023 am Fong esou z’exekutéiere plus ou moins, wéi e virgesi war."

D’Sam Tanson vun deene Grénge seet: "Vill vun deene Mesuren, déi geholl goufen iwwert déi lescht puer Jore wärend deene Krisen, schéngen hir Effekter gedroen ze hunn, well d’Situatioun elo awer net eng komplett negativ ass".

De Finanzminister Gilles Roth analyséiert sengersäits: "Dat ass natierlech en negative Schéiereffekt, an et muss ee kucken, och compte tenu vun der Konjunktur, datt een dee lues awer sécher iwwert déi nächste Budgetsjoeren zesummeféiert."

De Fred Keup vun der ADR hat nach keng Meenung zu den neien Zuelen: "Mir mussen déi lo emol genee duerchkucken an e bësse vergläichen, wou mer dru sinn, fir déi genee Analys ze maachen."