Domadder läit de Populatiounswuesstem tëscht dem 1.1.2021 an dem 1.1.2022 bei 1,7 Prozent an nees um Niveau vu virun der Corona-Pandemie. Dës Zuelen huet de Statec e Méindeg de Moie matgedeelt.
Am Joer 2021 si 25.335 Leit op Lëtzebuerg geplënnert a 15.959 hunn de Grand-Duché verlooss, dorënner 3.063 Lëtzebuerger, 3.055 Portugisen an 2.394 Fransousen. Bei den Awanderer maachen dann och d’Fransousen (12,8%) d’Majoritéit aus, dat virun den Italiener (9,6%) a Portugisen (8,9%).
Kuckt ee sech dann den Total vun den Awunner un, esou hunn 52,9 Prozent vun den 645.397 d’Lëtzebuerger Nationalitéit. Déi gréisst Communautéit vun Auslänner maachen d’Portugisen aus mat ronn 14,5 Prozent. Da kommen d’Fransouse mat 7,6 Prozent an d’Italiener mat 3,7 Prozent.
