No engem gréisseren Asaz en Donneschdeg den Owend bei der Sportshal zu Housen, respektiv beim Centre Écologique sinn elo weider Detailer bekannt. Fënnef Kanner aus enger Kolonie a véier Educateuren haten Ausschlag entwéckelt a koumen an d'Spidol. De Buergermeeschter vun der Gemeng Parc Housen, Romain Wester, huet RTL géintiwwer e Freideg de Moie confirméiert: "Et war wéinst Eichenprozessionsspinner".
Bei der Spillplaz nieft der Sportshal wieren Näschter. Den Areal gouf komplett ofgespaart an e Freideg de Mëtteg kënnt eng Spezialfirma, fir d'Näschter ewechzehuelen. D'Santé kënnt sech d'Situatioun op der Plaz och ukucken.
De Betraffene geet et antëscht nees gutt a si si schonn an der Nuecht op e Freideg zeréck an d'Kolonie kommen. D'Kanner géingen dann um Freideg de Moien och schonn nees spillen, esou de Buergermeeschter.
Et sinn 20 Kanner am Alter vu 4 bis 7 Joer, déi nach bis en Dënschdeg zu Housen hir Kolonie vum Roude Kräiz hunn.
