E Secteur mat responsabelen a transparente Finanze schafen, dat ass d'Missioun vun der Associatioun „Social Performance Task Force“, kuerz SPTF.
Déi international bekannt Plattform ass elo och zu Lëtzebuerg präsent. Si gëtt ënnerstëtzt vum Kooperatiouns- a vum Finanzministère.
SPTF leet sozial Standarde fest. Organisatiounen a Firme kréien et erméiglecht, sozial Objektiver ze definéieren, ze moossen an ze iwwerwaachen.
De Jürgen Hammer ass Responsabel fir d'Lëtzebuerger Branche a betount, dass d'Ministèren erkennen, wéi e Succès d'SPTF huet an dass et och elo e Standard bei de Mikrofinanze gëtt.
Déi zoustänneg Ministere Paulette Lenert a Pierre Gramegna ware beim Lancement haut present. De Finanzminister verweist bei där Geleeënheet op d'Wichtegkeet vun de Mikrofinanzen an den inklusive Finanzen zu Lëtzebuerg. Hei géifen nämlech 60% vun de weltwäite Fluxen zu Lëtzebuerg enregistréiert ginn. Domadder wier Lëtzebuerg e Leader an dësem Beräich.
D'Organisatioun SPTF ass a bal 130 Länner present a se huet ronn 3000 Memberen.
Hir nei Lëtzebuerger Adress fanne mer an der Maison de la microfinance an der Stater Glesener Strooss.
