De Béiermarché duerchlieft den Ament e kloren Trend no uewen, en Ëmschwong. An deen Ëmschwong wëll déi nei Confederatioun vun de Braumeeschter a Brauereien zu Lëtzebuerg mat begleeden an ënnerstëtzen. Déi nei Vereenegung ass e Mëttwoch den Owend nees, no 10 Joer Stëllstand, an d'Liewe geruff ginn, sot hire President de Mathias Lentz en Donneschden de Moien am RTL-Interview. Haaptzil ass et de Lëtzebuerger Béier ze promouvéieren an de ville Brauereien ze hëllefen. Där gëtt et antëscht méi wéi 25 zu Lëtzebuerg, dovunner och eng ganz Partie Micobrauereien.
19 vu 25 Braumeeschter a Brauereien hu sech e Mëttwoch der neier Confederatioun ugeschloss.
Zejoert ass d'Béierproduktioun zu Lëtzebuerg op méi wéi 290.000 Hektoliter geklommen. D'Leit géifen nees méi Béier, och méi verschiddene Béier drénken, sou de Mathias Lentz.
En Donneschdeg de Moien um 10 op 8 war de Mathias Lentz vun der Konfederatioun vun de Brasseuren Invité vun der Redaktioun.
