Ronn all 15. Salarié am Privatsecteur respektiv Mataarbechter beim Staat soll zejoert Suizidgedanke gehat hunn. Dat sinn der dräi Mol esou vill, wéi nach 10 Joer virdrun. Dës Donnéeën aus enger gréisserer Ëmfro hieft d‘Chambre des Salariés an hirer aktueller Publikatioun ervir. D‘Belaaschtungen am Beruff wieren immens grouss, wat esouwuel déi mental a physesch Gesondheet negativ beaflosst.
Wéi d‘Salariatskummer betount, kann een net kloer soen, datt dat eent dat anert ausléist, ëmmerhin hätt Suizid seelen nëmmen een Ausléiser. Allerdéngs géifen dës Donnéeë weisen, datt d'Aarbecht d'Leit esouwuel schützen, wéi och belaaschte kann.
Et ass deemno den Appell vun der Chambre des Salariés un d‘Employeuren Aarbechtskonditiounen ze schafen, déi op d‘Wuelbefanne vun de Leit oppassen an doduerch bei der Preventioun vu Suizid mathëllefen.
Leit, déi suizidär Gedanken hunn, kënnen Hëllef bei SOS Détresse um Telefon 45 45 45 kréien. All Informatioune fënnt een op www.prevention-suicide.lu
