An der aktueller Sessioun sinn déi 60 Parlamentarier besonnesch äifreg. Zënter Enn Oktober kruten d'Ministèrë scho ganzer 533 mol Post vum Krautmaart.
533 QPen, wéi se genannt ginn, dat sinn der am Verglach effektiv eng jett. Et sinn der 200 weider wéi bannent den éischte 5 Méint an der leschter Sessioun, seet de Chamberpresident Fernand Etgen.
Wa mer duerch d'Statistike bliederen, gesi mer, datt a ville Sessiounen am Ganze net sou vill parlamentaresch Froe gestallt goufe wéi an der aktueller, woubäi d'Chamber jo eigentlech réischt no de Koalitiounsverhandlungen Ufank Dezember au complet war a richteg ufänke konnt mat schaffen.
Vu Rekorder wëll de Chef vum Parlament trotzdeem lo mol net schwätzen
Besonnesch vill waren et der an der Sessioun 2015-2016, nämlech 969.
De Fernand Etgen fënnt den aktuellen Héichbetrib dann och net negativ Parlamentaresch Ufroe sinn e Recht, wat all Deputéierten huet an e Mëttel fir d'Regierung ze kontrolléieren.
Eisen Informatiounen no gi verschidde Ministeren awer carrement mat parlamentaresche Froen iwwerschwemmt a plazeweis dierft et net einfach sinn, d'Quantitéite geréiert ze kréien.
Déi Kéier sëtzt jo och eng Partei méi um Krautmaart: D'Piraten.
Ee Champion vun de QPen ass och de Piraten-Deputéierte Sven Clement, hien huet 60 Froe gestallt. D'Plaz 2 Um Podium geet un den ADR-Parlamentarier Fernand Kartheiser mat 55 Questions parlementaires.
Wäit vir an der Echappée fueren och mat: Martine Hansen, Mars di Bartolomeo, Marc Goergen, Laurent Mosar, André Bauler a Jeff Engelen.
Dacks stellt en Deputéierte seng Fro zesumme mat engem aneren, dacks ass dës Fro och u méi Ministèren adresséiert. Besonnesch vill Froen landen iwwerdeems um Pult vum Mobilitéits- a Bauteminister François Bausch. Et waren der méi ewéi 80.
