Géint 11:50 Auer en Donneschdeg gouf op der N27 beim Riesenhaff a Richtung Ueschdref gemellt, datt Damp aus engem Bësch géif kommen. Eng sëllegen Asazzenter goufen op d'Plaz geschéckt, blesséiert gouf awer keen.
Zu Garnech um CR101 a Richtung Holzem ass et um 12:35 Auer zu engem Accident mat engem Moto komm. Dobäi gouf eng Persoun blesséiert.
En zweeten Asaz am Zesummenhang mat engem Motorradsaccident gouf et um 14:05 Auer an der Côte d'Eich an der Stad. Do gouf zwar eng Ambulanz an d'Pompjeeë mobiliséiert, Blesséierter goufen awer keng gemellt.
Um 14:17 Auer koum et um Boulevard F. W. Raiffeisen um Ban de Gasperich zu enger Kollisioun tëscht engem Auto an engem Bus. Eng Persoun gouf dobäi blesséiert.
