Géint 16 Auer e Samschdeg war der Police en Déifstall an engem Buttek op der Place de la Gare an der Stad gemellt ginn. Wéi de Sécherheetsmann op der Plaz erkläert huet, hätte scho géint 14 Auer zwee Männer eng Fläsch Alkohol geklaut. Géint 16 Auer wieren déi zwee dunn zréckkomm an hunn eng Wallis an e Rucksak mat Alkoholfläschen an anere Produite gefëllt.
Wéi de Sécherheetsmann probéiert huet, déi zwee do ze halen, bis dass d'Police do wier, koum et zu enger Ausernanersetzung. Doropshi konnten d'Déif a Richtung Gare flüchten.
Méi spéit konnte si awer identifizéiert a festgeholl ginn. Och hei hu si sech hefteg widdersat a sech wärend dem Transport an och dono immens aggressiv verhalen. De Parquet huet ugeuerdent d'Männer ze verhaften.
