En Donneschdeg de Moie war d'Inneministesch eis Invitée vun der Redaktioun.

Wann op den 1. November d’nächst Woch den Delai fir déi nei PAGen ausleeft, wäert ronn een Drëttel vun de Gemengen am Land net konform sinn. Dat huet d’Inneministesch Taina Bofferding en Donneschdeg de Moien als eis Invitée vun der Redaktioun confirméiert. Si hunn deemno nach kee neien allgemengen Bebauungsplang fir hiren Territoire agereecht.

D’Ministesch huet awer relativéiert, dass eng ganze Partie Gemengen Enn des Joers, respektiv ufanks d’nächst Joer den éischte Vott am Gemengerot wäerten huelen, sou dass et dann awer scho vill besser géif ausgesinn. De Gros wäert duerch sinn, sou d'LSAP-Ministesch.

Den Delai verréckelen, wéit d’Ministesch op alle Fall net. D’Gemengen, déi net fir den 1. November fäerdeg ginn, sinn dann esou wäit blockéiert, dass se keng PAPen méi kënne stëmmen, an och de bestoende PAG net ännere kënnen. Bau-Geneemegunge kënnen d’Buergermeeschteren awer nach verginn, sou dass et net zu engem Bau-Stopp an deene Gemengen géif kommen, huet d’Taina Bofferding verséchert.

Wat d’Reform vun der Grondsteier ugeet, wier een iwwerdeems am Interieur am gaangen, eng nei Berechnungsformel opzestellen. Fir dat ze maachen, géifen eben och d’Daten aus den neie PAGen hëllefen. D’Taina Bofferding huet nach emol betount, dass mat der Reform virun allem Terrains-Proprietaire viséiert solle sinn, déi vill Terrain hunn an drop spekuléieren, an net Leit mat "just" engem Eegenheem.

E Code de deontologie fir Gemengemandataire wär eng gutt Saach, sot dann nach d'Inneministesch. De President vum Syvicol, den Emile Eicher, hat d'Noutwendegkeet vu sou engem Verhalenskodex ënnerstrach, dee misst séier kommen.

D'Gemenge solle méi Autonomie, méi Verantwortung kréien. Och an deem Kontext wär sou e Verhalenskodex wichteg, fënnt d'Taina Bofferding. Et wär awer net esou wéi wann een haut net scho Reegelen a Verflichtungen hätt, betount si weider. All Politiker géif vereedegt ginn.

Nach dëst Joer kéint awer eng legal Basis fir en Deontologie-Code geschafe ginn. Detailer kéinten da méi spéit ausgeschafft ginn, an Zesummenaarbecht mat de Gemengen.

Invité vun der Redaktioun: Taina Bofferding

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.