En Dënschdeg de Moie war den CSV-Deputéierten eisen Invité vun der Redaktioun.

De Confinement an d'Sortie elo, wieren déi richteg Decisioune gewiescht. Dat sot de Claude Wiseler de Moien am RTL-Interview. Den CSV-Deputéierten huet d’Kommunikatioun vun der Regierung awer zanter Ufank vun der Corona-Kris kritiséiert: als Beispiller huet hie kontradiktoresch Aussoen zu den Tester an zu de Maske genannt.

Och wat d'Hëllef fir d'Ekonomie ugeet, huet de Claude Wiseler zwar déi generell Mesure begréisst, mä elo géing et drëm goen, fir ganz präzis déi Betriber an déi Secteuren anescht ze begleeden. Sou kéint ee senger Meenung no ënnert anerem dem Horesca-Secteur seng fix Fraise wéi Loyeren iwwerhuelen.

Wat en neit Pandemie-Gesetz – oder Corona-Gesetz – ugeet, do ass den CSV-Deputéierte kloer dogéint, wann d'Regierung géing een allgemengt Gesetz maachen, wou d'Regierung ouni déi konstitutionell Reegele vum Etat de Crise kéint decidéieren, wat se wéilt. Et dierf kee Mëttel ginn, fir de Leit fundamental Fräiheeten ewechzehuelen.

Invité vun der Redaktioun: Claude Wiseler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.