E Freideg de Moie war de Generaldirekter vum CHL eisen Invité vun der Redaktioun.

Op een et zweet Well nennt oder net wier zweetrangeg.

Wat e gesäit, wier datt d'Fäll zouhuelen. Dat sot den Dr. Romain Nati, Generaldirekter vum CHL, e Freideg de Moien am RTL-Interview. E puer Wochen hätt e keng Patiente gehat.  Zanter Juni hätt een awer nees 17 Better vun 19 Better, déi fir Covid-Patiente reservéiert goufe, beluecht. Zwee Patienten am CHL sinn op der Intensivstatioun.

Differenz tëscht éischt oder zweeter Well: d'Patiente si méi jonk. Et wier een awer gutt opgestallt.  Elo kéint een op Erfarungswäerter vun der éischter Well zeréckgräifen.

Et wéisst een elo méi iwwert den Virus. Et hat ee wärend der 1. Well Pläng gehat, fir eng Pandemie-Gripp mat spezifesche Prozeduren an déi wieren ugepasst ginn op den Covid. Och d'Personal wär elo op d'Spezifizitéite vum Covid forméiert ginn, sou de Generaldirekter vum CHL, den Dr. Romain Nati, deen och erkläert huet, datt d'Projektioune vu Fuerscher, wéi zum Beispill déi vun Research Luxembourg, wuel ze relativéiere wieren, well se jo deels de „worst case“ beschreiwen. Et dierft een esou Prognosen awer sécher och net als komplett falsch verwerfen.

Et feelt un Personal

Eng Doléance vun de Spideeler bleift weiderhin de Manktem u Personal, confirméiert de Generaldirekter vum CHL. D'Prise en charge wär ganz komplex a géing vill vum Personal ofverlaangen. Et lafen Diskussioune mat der CNS fir méi Budget ze kréien, fir tëscht 80 an 100 Leit méi an de Spideeler anzestellen. Ze soen, dass een op engem gréngen Zweig ukomm wär, wär awer iwwerdriwwen sou den Dokter Romain Nati.

Beootmungsmaschinne géifen et den Ament och genuch ginn an d'Personal wär och fir intensiv-medizinesch Behandlungen ausgebilt, mä och all déi, déi do an den Asaz géinge kommen, géifen natierlech op aner Plaze feelen.

3 Covid-Etüden am CHL

An der Etüd Discovery hätt een aktuell 7 Patienten dran. Duerch des Etüd kéim ee vill besser un d'Medikament Remdesivir, wat eng gutt Saach wier, sou de Generaldirekter. Donieft gëtt et eng Etüd, déi aktuell nach e Projet ass, wou den Plasma vu Bluttspender soll benotzt ginn am Kampf géint de Virus. An dann eng drëtt Etüd, wou de CHL och drun deel hëlt a wou d'Sequelle vun de Leit, déi eng Infektioun haten, analyséiert ginn.

Invité vun der Redaktioun: Dr. Romain Nati

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.