De Francesco Bagnaia huet als Zweete vill Punkten op de WM-Leader Jorge Martin (15.) guttgemaach.

De MotoGP-Weltmeeschter Francesco Bagnaia (Ducati) huet am Reepoker vu Misano vill Buedem op de WM-Leader Jorge Martin (Ducati) guttgemaach. Bei der zweeter Victoire noenee fir de Marc Marquez (Ducati) ass den Italieener beim Grousse Präis vu San Marino op déi zweet Plaz gefuer, wärend de Martin als 15. nëmmen ee Punkt kritt huet.

De Martin, deen de Sprint e Samschdeg gewonnen hat, huet am Ufank vun der Course seng Maschinn gewiesselt, well et ugefaangen hat mat Reenen. De Bagnaia dogéint ass op senger Maschinn bliwwen, wat um Enn déi richteg Decisioun sollt sinn, och wann hien de Marquez net hale konnt.

De Spuenier Marquez, deen eréischt de leschte Weekend zu Aragon säin éischte Grand-Prix-Succès zanter 1.043 Deeg gefeiert hat, huet deemno direkt nogeluecht a kéint a senger aktueller Form och nach emol e Wuert ëm den Titel matschwätzen.

Bei nach siwe Course-Weekender läit de Marquez op der drëtter Plaz am WM-Klassement mat 259 Punkten. De Leader Martin huet 312 Punkten an nëmme méi eng Avance vu siwe Punkten op de Bagnaia.

An der Moto2 huet sech den Ai Ogura d'Victoire beim San Marino GP geséchert an ass den neie Leader an der Moto2-Weltmeeschterschaft. De Sergio Garcia ass net iwwer déi 12. Plaz erauskomm an huet seng Féierung am General missen ofginn.

Den Angel Piquera huet sech duerch eng staark Leeschtung an der Moto3 d'Victoire geséchert. No engem duebele Long Lap war de Pilot vu Leopard Racing op déi 17. Plaz zeréckgefall. Hien huet sech duerno nees duerch d'Feld gekämpft an ass um Enn als Éischten iwwer d'Zillinn gefuer. Mat engem Réckstand vun nëmmen 0,035 Sekonnen ass den Daniel Holgado den Zweete ginn. Den Ivan Ortola huet sech déi lescht Plaz um Podium geséchert. De Leader an der Moto3-Meeschterschaft David Alonso ass nëmmen de 7. ginn.

Um RTL Play fannt Dir d'Coursse vun der MotoGP, der Moto2 an der Moto3 fir eng begrenzt Zäit am Replay.

D'Resultater vun de Courssen

MotoGP

1 M. Marquez Ducati 41:52.083
2 F. Bagnaia Ducati 3.102
3 E. Bastianini Ducati 5.428
4 B. Binder KTM 14.185
5 M. Bezzecchi Ducati 16.725

Moto2

1 A. Ogura  MT Helmets - MSI 35'26.583
2 A. Canet  Fantic Racing +0.609
3 T. Arbolino  Elf Marc VDS Racing Team +4.639
4 M. Gonzalez  QJMOTOR Gresini Moto2 +6.948
5 J. Dixon  CFMOTO Inde Aspar Team +10.863

Moto3

1 Á. Piqueras  Leopard Racing 34'02.766
2 D. Holgado  Red Bull GASGAS Tech3 +0.035
3 I. Ortola  MT Helmets - MSI +0.226
4 T. Furusato  Honda Team Asia +0.259
5 C. Veijer  Liqui Moly Husqvarna Intact GP +0.491

De General

MotoGP

1. Jorge Martin 312
2. Francesco Bagnaia 305
3. Marc Marquez 259

Moto2

1. Ai Ogura 175
2. Sergio Garcia 166
3. Joe Roberts 133

Moto3

1. David Alonso 246
2. Daniel Holgado 176
3. Ivan Ortola 173