Déi zweet Etapp vum Tour Down Under am Cyclissem gouf e Mëttwoch de Moien fréi vum Australier Caleb Ewan gewonnen.

Den australesche Cyclist huet sech am Sprint géint de Südafrikanr Daryl Impey behaapt an ass och neie Leader am General.

De Ben Gastauer ass do den 33. op 10 Sekonnen. De Michel Ries huet Zäit verluer an ass de 99. op 4 Minutten 39.

2 Lëtzebuerger testen hir Form

Mam Ben Gastauer a Michel Ries sinn och zwee Lëtzebuerger mat dobäi, déi hir Form ganz fréi an der Saison testen. No de schwéiere Bëschbränn ass des Course awer e bësse méi speziell wéi déi Joren virdrun.

Australien gouf an de leschte Wochen net verschount, no de schwéiere Bëschbränn koum déi lescht Deeg op ville Plazen zolitte Reen dobäi, dee wuel géint d'Feier gehollef huet, allerdéngs deelweis fir zolidd fir Iwwerschwemmungen gesuergt huet.

De Ben Gastauer kritt nëmmen deelweis mat wéi schlëmm et bei de Bëschbränn war. An apropos Course, do ass et op der zweeter Etapp net alt ze gutt fir dem Lëtzebuerger seng Equipe AG2R gelaf. De Ben Gastauer ass mat senger eegener Form sou fréi an der Saison awer ganz zefridden.

Den Tour Down Under wäert e Sonndeg no 6 Etappen op en Enn goen an nieft dem Ben Gastauer ass mam Michel Ries, dee fir Trek fiert och nach een zweete Lëtzebuerger dobäi.