D'Damme vum CHEV konnte sech auswäerts bei der 1. Finall mat 3:1 zu Walfer behaapten. E Samschdeg konnte sech well d'Dikrech Häre mat 3:0 behaapten.

Dammen-Volleyball

Walfer – CHEV Dikrech 1:3 (19:25, 22:25, 25:19, 23:25)

D’Damme vu Walfer waren an der Ausernansetzung géint d’Ekipp aus der Iesels-Stad déi kloer Favoritinnen. D’Formatioun ronderëm d’Nathalie Braas wollt dann och der Favoritteroll virum eegene Public gerecht ginn.

De CHEV wollt sech awer net esou liicht geschloe ginn an huet gehofft, de Walfer Dammen ee Been ze stellen a soumat fir eng Iwwerraschung an der 1. Finall ze suergen.

Den 1. Saz goung dunn och e bëssen iwwerraschend un d'Damme vun der Sauer, dat mat 25:19. An och den 2. Saz war Dikrech déi méi dominant Ekipp an huet sech mat 25:22 kënne behaapten. Duerno ass Walfer awer esou lues erwächt an nom 25:19 am 3. Saz hätt ee kéinten unhuelen, datt Walfer e puer Schëppen drop géif léien.

Am 4. Saz konnt sech Dikrech awer dunn erëm ofsetzen a war tëschenzäitlech mat 3-4 Punkten Ecart am Avantage. Walfer koum awer op ee Punkt un de CHEV erun, ma Dikrech huet awer weider Gas ginn an an der Schlussphas den Deckel dropgeluecht.

Och wa Walfer nach eemol op ee Punkt zeréckkoum, war d'Victoire an der 1. Finall den Damme vun Dikrech net méi ze huelen.

Hären-Volleyball

Fenteng – CHEV Dikrech 0:3 (21:25, 21:25, 14:25)

CHEV Dikrech klappt Fenteng 3:0
Dikrech konnt sech auswäerts zu Fenteng mat 3:0 behaapten.

Fenteng hat d’Chance, fir virun eegene Public an der éischter Finall – vu méiglechen dräi – virzeleeën a sech eng gutt Optioun fir déi zweet Finall an enger Woch ze sécheren. Den Titelverdeedeger a Coupegewënner aus der leschter Saison stoung géint de CHEV vun Dikrech awer ënner Drock.

D’Nervositéit vun der Ekipp vum Trainer Dragan Vujovic huet een am 1. Saz dann och ufanks gesinn - zäitweileg war Dikrech mat engem Ecart vun 3-4 Punkten am Avantage. De CHEV huet um Holleschbierg ganz vill duerch d'Mëtt gespillt an dat war an der Ufanksphas ee gutt Mëttel, fir un d'Punkten ze komme - den 1. Saz ass deemno mat 25:21 zu Gonschte vun den Dikrecher op en Enn gaangen.

Am 2. Saz wollt Fenteng awer dunn äntweren an dat ass hinnen och mat engem gudde Start gelongen - tëschenzäitlech hat d'Heemekipp ee Virsprong vu 4 Punkten. Ma Dikrech hat awer ee gudden Dag erwëscht a koum mat enger super Leeschtung erëm zeréck a konnt schliisslech och den 2. Saz mat 25:21 gewannen.

Den 3. Saz war du bei Fenteng de Rimm definitiv erof. No enger ganz zolitter Leeschtung vum CHEV krut d'Heemekipp am leschte Saz just 14 Punkten. Absolut verdéngt war deemno dës Victoire vun der Formatioun aus der Iesels-Stad.

Alleguer d'Resultater