No der Defaite an den Halleffinalle konnte sech d'Lëtzebuerger e Freideg am Nomëtteg nach Bronz sécheren.

AUDIO: Defaite fir FLVB-Hären, Bronz am Beachvolleyball / L. Kayser

Am Match ëm déi 3. Plaz am Beachvolleyball hu sech d'Lëtzebuerger Matthias Cloot / Petko Tunchev d'Bronzmedail geséchert.

Si hu sech an zwee Sätz mat 21:15 an 21:18 géint d'Koppel Pascal Ferry / Alexandre Biton aus Monaco duerchgesat. Domadder ass de Lëtzebuerger d'Revanche gegléckt, well an der Gruppephas hat een nach géint de Monegasseschen Duo verluer.

De Matthias Cloot an de Petko Tunchev haten e Freideh de Moien d'Finall ganz knapp verpasst. Et war eng enk Partie tëscht de Lëtzebuerger an dem zyprioteschen Duo Chrysostomou / Liotatis. Deen éischt Saz hu Cloot an Tunchev misse mat 20:22 ofginn, deen duerno huet een dunn dominéiert a mat 21:7 gewonnen. D'Decisioun huet also missen am drëtten an decisiven Saz falen. Hei loungen d'Lëtzebuerger mat 10:7 a Féierung, ma Zyprioten hunn dunn op 11:11 ausgeglach an de Saz um Enn mat 15:13 gewonnen a sech fir d'Finall qualifizéiert.

Trotz der Néierlag huet de Matthias Cloot séier nom Match schonn nees dat Positiivt gesinn, well no der Néierlag direkt am Ufank vum Tournoi hat een net domadder gerechent iwwerhaapt an d'Halleffinallen ze kommen.