E Samschdeg den Owend war am Hären-Basket den Optakt vun der neier Saison an der Total League. Och bei den Dammen war et den 1. Spilldag.

Hären-Basket

Arantia Fiels - Amicale Steesel 90:86

Déi Steeseler wollten an der Fiels fir den Optakt vun der neier Saison punkten an dat hu si vun Ufank un ënner Beweis gestallt. Am 1. Quarter konnt d'Amicale sech géint d'Arantia schonn een agreabele Polster vun 30:19 erspillen an de Fielser Coach zu engem 1. Time-Out zwéngen. Ënnert der Verantwortung vum Jo Hoeser huet Steesel weider gutt opgespillt a konnt ënner anerem mat Schëss aus der Distanz iwwerzeegen. Am 2. Véierel ass de Chrono bei 21:21 stoe bliwwen. 51:40-Féierung fir d'Steeseler an der Paus.

Weider goung mat enger Remontada vun de Fielser. Well d'Amciale nom Téi ze passiv war, konnt d'Heemekipp an dësem geckege Match nees zeréck an d'Partie fannen an den 3. Véierel 20:13 fir sech entscheeden. Den Impuls koum mat der Awiesselung vum Fielser Kapitän Luc Kirpach, dee mat senge Punkten fir ee regelrechten Opschwong bei der Arantia gesuergt huet.

Steesel konnt net wierklech reagéieren an huet d'Arantia weider mat villen Turn-overen an d'Partie bruecht. Déi couragéiert Leeschtung vun de Fielser gouf um Enn belount an esou stoung no dem 90:86-Erfolleg am leschte Quarter eng 1. Victoire fir den Underdog um Tableau.

© Shari Schenten

AB Contern - Basket Esch (87:87) 92:106 n.V.

Den Opsteiger vu Konter ass gutt géint de Favorit vun Esch an d'Partie komm. Mat der Euphorie vum Opstig déi lescht Saison hu si déi Escher an der Ufanksphas iwwerrascht. Virun allem ee Mann konnt dobäi seng gutt Form ënner Beweis stellen: de Karrington Ward, den neie Mann vum ABC. Hien huet net just um Stéck selwer markéiert, ma och seng Matspiller exzellent an d'Zeen gesat. D'53:42-Féierung vu Konter no 34:21 am 1. an 19:21 am 2. Quarter war deemno verdéngt.

© Franky Hippert

Och am weidere Verlaf vun der Partie war den ABC déi besser Ekipp, stoung an der Defense extrem stabil, och wann no fir d'Konzentratioun lues a lues nogelooss huet. Den 3. Quarter huet de Basket Esch mat 21:18 gewonnen an et gouf nach eemol an de leschte Minutte fir den Opsteiger enk. D'Ekipp aus der Minett-Metropol huet weider Gas ginn an huet sech tatsächlech mat engem 24:16 beim Stand vum 87:87 an d'Verlängerung gerett.

An dëser Verlängerung ass Konter lues awer sécher d'Loft ausgaangen an no enger ganz couragéierter Leeschtung vum Opsteiger huet den ABC um Enn missen eng Defaite astiechen. D'Verlängerung goung mat 19:5 zu Gonschte vun den Escher aus, dat gläichzäiteg d'Victoire fir de Basket Esch bedeit huet.

© Franky Hippert

T71 Diddeleng - Sparta Bartreng 76:87

Bartreng huet als Auswäertsekipp zu Diddeleng den 1. Véierel dach iwwerraschend mat 21:13 fir sech entscheede kënnen. D'Sparta hat den T71 um falsche Fouss erwëscht, deen huet awer am 2. Quarter eng Reaktioun gewisen an ënnert dem Impuls vum Frank Muller nees zeréck an de Match fonnt. An awer stoung et no den éischten 20 Minutten 41:36 fir d'Gäscht.

Bartreng war och am 3. Quarter ënnert dem Impuls vum Robinson, Arendt a Williams déi méi aktiv Ekipp a konnt dëse mat 21:16 fir sech entscheeden. Den T71 Diddeleng huet dunn am leschte Véierel nach eemol alles op eng Kaart gesat, wollt an dës Partie zeréckkommen, huet  de 4. Quarter och 25:24 gewonnen, ma d'Sparta war e Samschdeg den Owend awer ze staark.

E bëssen iwwerraschend stoung den Eric Jeitz fir den T71 Diddeleng e Samschdeg den Owend bei der Defaite vun Diddeleng um Parquet. Hie soll no der Blessur vum Tom Schumacher der Ekipp eng Hand mat upaken a mat senger Erfarung ënnerstëtzen.

T71 Diddeleng - Sparta Bartreng 76:87
E bëssen iwwerraschend gewënnt d'Sparta géint Diddeleng nodeems dës den 1. Véierel e bësse verschlof haten.

Musel Pikes - US Hiefenech 83:72

Hiefenech ass fir de Kont vum 1. Spilldag un d'Musel gereest. Hei huet mat de Pikes eng haart d'Noss op d'Ekipp ronderëm den Denell Stephens gewaart. Ma d'Gäscht koumen awer gutt an de Match a konnten den 1. Véierel knapp 19:18 gewannen. Kuerz virun der Paus hunn d'Miseler awer ee Gank eropgeschalt a sou si si no engem 24:16 mat enger 42:35-Féierung am Réck op den Téi gaangen.

An der 2. Hallschecht konnten d'Pikes un déi zolitt Leeschtung aus dem 2. Véierel uknäppen an doduerch och den 3. 23:16 gewannen. De Virsprong vun de Miseler ass deemno weider an d'Luucht gaangen. Hiefenech koum am leschte Quarter mat 21:18 nach eemol erun, ma um Enn waren d'Miseler ze staark an hunn näischt méi ubrenne gelooss.

Racing - Etzella Ettelbréck 72:68

Am Tramsschapp an der Stad war den Doublégewënner aus der viregter Saison op Besuch. Deementspriechent motivéiert sinn déi Stater géint d'Ekipp aus dem Däich an de Match gaangen. Etzella konnt trotzdem gutt dergéint halen an den 1. Véierel mat 18:15 fir sech entscheeden. Ënnert dem Impuls vum Steven Mersch a Louis Soragna huet sech Racing am 2. Véierel mat 19:15 zeréck kaaft - ee knappt Resultat vu 34:33 an der Paus.

De Schwong aus dem 2. Véierel hunn déi Stater och mat an den 3. geholl an dëse mat 25:21 fir sech entscheet. D'Etzella war mat de Lëtzebuerger Delgado a Gutenkauf beméit, nees zeréck an de Match ze fannen, ma hu sech awer géint staark Spiller vum Racing d'Zänn ausgebass.

Racing - Etzella Ettelbréck 72:68
An engem spannende Match hu sech déi Ettelbrécker géint eng staark Ekipp vum Racing d'Zänn ausgebass.

Dammen-Basket

Musel Pikes - Telstar Hesper 84:68

D'Miseler Damme koume géint den Telstar Hesper am 1. Véierel net iwwer ee 17:20 eraus, hunn awer am 2. Véierel e puer Schëppen drop geluecht an dëse mat 27:17 däitlech fir sech entscheet. Et goung mat engem 44:37 fir d'Heemekipp fir d'Paus an d'Kabinnen.

D'Pikes hunn och am 2. Duerchgang kee Gank zeréck geschalt, mä am Géigendeel de Fouss um Gas gelooss. 20:15 am 3. an 20:16 am 4. Quarter hunn dozou geféiert, datt d'Miseler mat 84:68 als Gewënner vum Parquet gaange sinn.

T71 Diddeleng - Sparta Bartreng 76:53

Diddeleng ass als Favorit géint Bartreng an de Match gaangen. Den T71 huet vun Ufank un op den Tempo gedréckt a konnt den 1. Véierel mat 24:7 fir sech entscheeden. Den 2. Quarter war net méi grad esou däitlech, ma nach ëmmer eesäiteg a goung mat 22:17 op en Enn - 46:24 an der Paus. Sparta koum nom Téi nach eng Kéier mat engem 17:15 zeréck, huet awer am leschte Véierel nees mat 12:15 de Kierzere gezunn. Deemno ee verdéngte Succès fir d'Diddelenger Dammen.

AB Contern - Basket Esch 60:78

Den AB Contern wollt Esch doheem ee Fouss stellen, ma den 1. Véierel war mat 23:13 fir d'Gäscht aus der Minett-Metropol. Ausgeglach goung et du mat engem 18:18 weider an esou goung et mat 41:31 fir Esch op den Téi. Och no der Paus hun den ABC gutt géint déi Escher mat gehalen, soudatt den 3. Véierel 23:23 op en Enn goung. Am leschte Quarter dunn hunn déi Escher awer ugezunn an hu mat engem 14:6 fir kloer Verhältnisser gesuergt.

© Franky Hippert

Résidence Walfer - Amicale Steesel 77:56

Schonn e Freideg den Owend hat de Gréngewald d'Etzella op Besuch. Hei konnt sech d'Lokalekipp 79:68 behaapten.

Den Iwwerbléck vun der Nationale II