Um Belair gouf e Samschdeg d'Super Cup am Dammen- an Hären-Volleyball gespillt. Bei den Damme war d'Victoire fir Walfer, bei den Häre fir Stroossen.

Super Cup bei den Hären

Chev Dikrech - VC Stroossen 0:3

Och am Hären-Volleyball gouf e Samschdeg den Owend d'Super Cup gespillt - hei ass de Chev Dikrech op de VC Stroossen getraff. Hei hat de Favorit aus der Ieselsstad ee schwéiere Stand am 1. Saz, well dësen ass mat 19:25 verluer gaangen. Den 2. Saz war scho méi equilibréiert, ma um Enn huet sech och dësen de VC Stroossen, déi Kéier knap pmat 25:23, geséchert. Esou goung et fir déi Stroossener mat engem 2:0-Virsprong an den 3. Saz.

An och do huet et ufanks gutt fir de VC Stroossen ausgesinn - séier hat ee sech eng Féierung vu 4-5 Zieler erausgespillt. De Champion vun zejoert koum am weidere Verlaf vun der Partie net méi zeréck an de Match, soudatt sech de Coupegewënner vu Stroossen am 3. Saz um Enn däitlech mat 25:16 behaapte konnt.

Super Cup bei den Dammen

RSR Walfer - Chev Dikrech 3:0

Den Doublégewënner vu Walfer ass an der Super Cup bei den Dammen op de Chev vun Dikrech getraff. D'Dammen aus der Ieselsstad haten an den éischten zwee Sätz géint d'Walfer-Dammen näischt ze gutt - si gounge mat 25:8 respektiv 25:14 op en Enn.

Den drëtte Saz huet de Chev awer gutt ugefaangen a konnt a Féierung goen. An am weidere Verlaf vum Saz ass de Virsprong fir d'Dikrecher Damme awer weider erofgaangen. Dikrech konnt hiren Avantage net verdeedegen an esou war et Walfer, déi mat engem 25:23-Sazgewënn an enger 3:0-Victoire insgesamt den Deckel op de Match geluecht hunn.