Fir de Kont vum 5. Spilldag am nationalen Dëschtennis-Championnat hunn de Gilles Michely a Co mat 6:3 géint den Houwald gewonnen.

Diddeleng bleift dës Saison am nationalen Dëschtennis-Championnat weider ongeschloen. De Champion an aktuelle Leader huet sech mat 6:3 géint den Houwald duerchgesat. An der Tabell hunn de Gilles Michely a Co elo e Virsprong vun 3 Punkten op den Houwald an Hueschtert/Foulscht. Den Houwald hat dës Saison iwwerraschend Punkte géint den Opsteiger d'Union Punkte leiegelooss.

Hueschtert/Foulscht konnt sech um 5. Spilldag an der BDO -League wichteg Punkten an der Course ëm eng Plaz am Titelgrupp sécheren. D'Ekipp ronderëm de Maël Van Dessel huet sech beim direkte Konkurrent Éiter/Waldbriedemes mat 6:3 duerchgesat.

Keng Victoire gouf et fir d'Iwwerraschungsekipp an der nach jonker Saison. D'Union huet sech misse mat 3:6 zu Berbuerg geschloe ginn.

Am Kellerduell mussen Iechternach a Rued weider op déi éischte Victoire an dëser Saison waarden. Am direkten Duell hu si sech mat engem 5:5-Gläichspill getrennt.