Bei den Häre ka sech de kloere Favorit Diddeleng mat 42:19 zu Péiteng duerchsetzen.

E Sonndeg war am Lëtzebuerger Handball-Championnat bei den Hären d'Suite vum 12. Spilldag.

Härenhandball

HB Péiteng - HB Diddeleng 19:42 (10:20)

Péiteng hat um Sonndeg den Owend Besuch vum HB Diddeleng. D'Lokalekipp war an de Ufanksminutte wuel beméit de Match ausgeglach ze halen, ma waren déi Diddelenger iwwer 60 Minutte gekuckt einfach ze staark. No 15 Minutte louchen d'Gäscht mat 11:6 a Féierung. Mat engem 7:0 Laf virun der Paus huet de Favorit vun Diddeleng e grousst Lach gerappt a fir d'Virentscheedung gesuergt. Mat 20:10 sinn déi Diddelenger an d'Paus gaangen.

An der 2. Hallschent huet den HBD de Ball weider lafe gelooss, sou dass déi Péitenger ni méi an de Match komm sinn. Diddeleng klappt Péiteng um Enn mat 42:19.

Red Boys - HC Bierchem 29:21 (12:8)

Bei der Spëtzepartie vum 12. Spilldag bei den Häre waren déi Déifferdenger doheem géint Bierchem gefuerdert. D'Red Boys wollte mat enger Victoire an der Tabell no um Leader Esch bleiwen an no den éischte Minutten huet dëse Projet och scho ganz gutt ausgesinn. D'Réiserbänner hu misse reagéieren, ma hu sech géint dominant Red Boys an e staarken Déifferdenger Kipper schwéier gedoen. An der Paus louchen déi Déifferdenger verdéngt mat 12:8 am Avantage.

Wie geduecht hat, datt d'Réiserbänner am 2. Duerchgang net méi u sech géife gleewen, deen hat sech geiert. Nom Téi war et nämlech den HC Bierchem, dee mat Schwong aus de Kabinne koum: 13:13 no 37 Minutten. Séier hunn d'Red Boys de Réiserbänner nees de Wand aus de Seegele geholl a konnten op e puer Unitéiten dovun zéien. Wat d'Partie méi al gouf, wat d'Déifferdenger d'Avance weider ausbaue konnten an esou hu si d'Partie um Enn mat 8 Goler Ecart fir sech entscheet.

Red Boys klappt den HC Bierchem
Déifferdeng kann d'Spëtzepartie um Enn mat 8 Goler Ecart fir sech entscheeden.

HB Käerjeng - Chev Dikrech 42:38 (21:15)

D'Ekipp aus der Brauereisstad goung als Favorit an de Match géint d'Formatioun aus der Ieselsstad. Käerjeng géint Dikrech war an den Ufanksminutten eng ganz serréiert Partie - d'Féierung ass hin an hier gaangen. Op der Véierelsstonn krut d'Heemekipp awer ee Lach a konnt sech bis zu der Paus hi mat 21:15 ofsetzen. Am weidere Verlaf vun der Partie huet Käerjeng weider gutt opgespillt an d'Féierung bis zum Schluss kënne geréieren.

HBC Schëffleng - HB Esch 12:34 (5:14)

De Leader vum HB Esch war géint Schëffleng an der klorer Favoritteroll a wollt dës och vun Ufank un ënner Beweis stellen. Mat engem ganz eesäitege 14:5 goung et no den éischten 30 Minutten an d'Paus. Nom Téi huet d'Ekipp aus der Minettsmetropol de Fouss net vum Gas geholl an nach 20 Goler dropgesat.

Dammenhandball

HB Diddeleng - Chev Dikrech 27:25 (13:13)

An der Spëtzepartie sinn d'Dikrecher Dammen an d'Forge du Sud gereest. Hei wollt de Leader Diddeleng d'Tabelleplaz 1 géint de Chev verdeedegen. D'Spectateuren hunn eng ganz ausgeglache Partie an der 1. Hallschecht gesinn, esou goung et mat engem 13:13 an d'Paus. Dono goung et serréiert weider, ma um Enn sollt d'Ekipp aus der Ieselsstad awer de Kierzeren zéien.

HB Esch - HC Standard 23:24 (9:10)

Am Kellerduell war den HC Standard beim HB Esch op Besuch. An der Paus louch de Standard nach mat 9:10 hannen. An der 2. Hallschecht hu sech d'Gäscht zu Esch knapp duerchgesat.

HB Museldall - HB Käerjeng 19:22 (5:15)

Käerjeng ass favoriséiert an d'Partie géint den HB Museldall gaangen. No den éischten 30 Minutten stoung et 5:15 un der Musel. D'Miseler konnten an der 2. Hallschecht een anert Gesiicht weisen, Käerjeng huet awer näischt méi ubrenne gelooss.