Et ass déi 1. Kéier, dass souwuel d'Damme wéi och d'Häre gläichzäiteg d'Goldmedail am Novotel-Cup kënne feieren.

Souwuel bei den Häre wéi och bei den Damme war virum leschte Gruppematch kloer, dass béid Formatiounen dësen Tournoi géife gewannen, vu datt si hir Matcher all mat 3:0 gewonnen haten an England um Sonndeg de Moie bei den Hären 2 a bei den Dammen 1 Saz hänke gelooss hunn.

Lëtzebuerg - Island 3:1 (25:15, 16:25, 27:25, 25:22)

Ouni groussen Drock sinn also d'Dammen an de Match gaangen a sou hu si och opgespillt. De Gaascht aus Island hat am 1. Saz näischt ze radetten, dee Lëtzebuerg ouni grouss Méi mat 25:15 fir sech entscheet huet. Am 2. Saz hunn d'Spectateuren dunn een ëmgekéiert Bild gesinn. Lëtzebuerg hat Problemer an Island huet besser opgespillt wéi am 1. Saz, sou dass d'Gäscht dësen 2. Saz mat 25:16 gewonnen hunn. Am 3. Saz hu béid Ekippe sech näischt geschenkt. Mol louch déi eng Formatioun vir, da rëm déi aner. No engem ganz spannende Saz kënne sech d'Lëtzebuerger Damme mat 27:25 duerchsetzen. Och am 4. Saz war et bis zum Schluss ganz spannend. D'Lëtzebuergerinnen hunn awer och dëse mat 25:22 fir sech entscheet a feieren domat am 3. Match hir 3. Victoire sou wéi déi 1. Plaz am General.

© SERGE OLMO

Lëtzebuerg - Island 3:0 (26:24, 28:26, 25:22)

Eng ganz engagéiert Leeschtung bei de Lëtzebuerger, déi 22:17 a Féierung louchen. Island ass wuel zeréck komm, ma sollt de Saz awer net méi ëmdréinen. D'Rout Léiwe sollten dëse 26:24 gewannen. Den 2. Saz ass Island besser erakomm, ma d'Spiller ronderëm de Kapitän Chris Zuidberg hu sech net opginn an hu sech erëm op 18:19 erugekämpft. An engem ganz serréierte Saz setze sech d'Lëtzebuerger mat 28:26 duerch. D'Spectateuren hunn och am 3. Saz eng immens serréiert Partie gesinn. Island huet gekämpft, ma Lëtzebuerg huet sech net beandrocke gelooss a gewannen och dësen 3. Saz mat 25:22. No 2016 an 2017 ass et déi 3. Kéier, dass d'Lëtzebuerger Hären den Novotel-Cup kënne gewannen.

De Programm mat de Resultater vum Novotel-Cup 2020

Freideg, 3. Januar 2019
12h30 Auer: Island - England (Hären) 1:3 (22:25, 25:20, 24:26, 15:25)
15h00 Auer: Schottland - Island (Dammen) 1:3 (26:24, 19:25, 20:25, 19:25)
17h30 Auer: Lëtzebuerg - England (Dammen) 3:0 (27:25, 25:14, 25:18)
20h00 Auer: Lëtzebuerg - Schottland (Hären) 3:0 (25:15, 29:27, 25:16)

Samschdeg, 4. Januar 2019
12h30 Auer: Island - England (Dammen) 0:3 (13:25, 17:25, 20:25)
15h00 Auer: Schottland - Island (Hären) 1:3 (17:25, 26:24, 23:25, 32:34)
17h30 Auer: Lëtzebuerg - England (Hären) 3:0 (25:22, 25:15, 25:18)
20h00 Auer: Lëtzebuerg - Schottland (Dammen) 3:0 (25:16, 25:21, 25:15)

Sonndeg, 5. Januar 2019
10h00 Auer: England - Schottland (Hären) 3:2 (18:25, 25:19, 25:17, 19:25, 15:8)
12h00 Auer: England - Schottland (Dammen) 3:1 (25:22, 25:21, 12:25, 25:18)
15h00 Auer: Lëtzebuerg - Island (Dammen) 3:1 (25:15, 16:25, 27:25, 25:22)
17h30 Auer: Lëtzebuerg - Island (Hären) 3:0 (26:24, 28:26, 25:22 )