E Samschdeg konnt sech Diddeleng 4:0 géint Rued behaapten an zitt domat an d'Finall vun der Coupe am Dëschtennis an. Do waart elo den Houwald.

Den éischte Schrëtt a Richtung Finall huet den Zoltan Fejer-Konnerth mat sengem 3:0 géint d'Annick Stammet gemaach. De Gilles Michely konnt iwwerdeems géint d'Tessy Gonderinger nozéien, och wann d'Spillerin vu Rued nach den 1. Saz fir sech entscheede konnt. Och den Diddelenger Dennis Müller konnt säi Match géint de Maximilian Reinert gewannen a wéi de Fejer-Konnerth dunn dem Tessy Gonderinger a sengem 2. Match wéineg Chance gelooss huet, war de 4:0 an d'Finall an dréchenen Dicher.

Den Houwald huet sech e Freideg den Owend zu Munneref deen éischten Ticket fir d'Finall vun der Coupe de Luxembourg geséchert.

D'Ekipp ronderëm den Irfan Cekic huet sech an der Halleffinall kloer mat 4:0 géint Iechternach duerchgesat. De Xu Wang huet seng Partie mat 3:1 géint den Traian Ciociu gewonnen. Den Irfan Cekic huet seng zwee Matcher géint den Aleksandr Kraskovskii an den Traian Ciociu kloer mat 3:0 gewonnen a fir den Ademir Balaban gouf et och een 3:0 an dat géint de Laurent Boden.

Géint wien den Houwald e Sonndeg de Mëtteg an der Finall muss untrieden, dat decidéiert sech e Samschdeg. An der zweeter Halleffinall kritt den Titelverdeedeger Diddeleng et vu 15 Auer u mat Rued ze dinn.

D'Finall gëtt e Sonndeg um 16 Auer an der Sportshal um Holleschbierg gespillt. Op RTL.lu fannt Dir och de Livestream mat de Matcher.

Coupe des Dames

Bei den Damme sti Rued an Nidderkäerjeng 1 an der Finall. Rued huet sech e Freideg den Owend mat 4:2 géint den Houwald duerchgesat. An der zweeter Halleffinall gouf et eng 4:0-Victoire fir d'éischt Ekipp vun Nidderkäerjeng géint d'zweet Ekipp vun Nidderkäerjeng.

D'Finall vun der Coupe des Dames gëtt och e Sonndeg am Nomëtteg gespillt.

Den Iwwerbléck vun der Coupe am Dëschtennis.