D'Lëtzebuerger Handball-Nationalekipp huet en Donneschdeg den Owend an der Coque den Allersmatch vun der EM-Qualifikatioun mat 33:38 géint Estland verluer.

Bei enger morer Kuliss vu ronn 450 Spectateuren haten d’Rout Léiwen exzellent ugefaangen a waren no 2 Minutten 3:0 am Avantage. No 11 Minutte waren d’Este fir d’éischt vir an zwar bei 6:5.

De Match ass equilibréiert weidergaangen. An der Paus stoung et 17:18, obwuel ze vill individuell Feeler gemaach goufen.

No der Paus sinn d'Lëtzebuerger dru bliwwen. No 42 Minutte stoung et 23:23 gläich, virun allem well de Mika Herrmann staark gehalen huet.

Nom 10. Gol vum Tommy Wirtz stoung et an der 55. Minutt 32:32 gläich.
An de leschten 2-3 Minutten hunn d'Lëtzebuerger forcéiert a sech hir Chancë warscheinlech och fir de Retourmatch verspillt.

De Lëtzebuerger Coaching war net ëmmer nozevollzéien. De Retourmatch ass e Sonndeg am fréie Mëtteg an Estland.

Um Donneschdeg huet den Escher Christian Bock, wéinst enger liichter Verletzung, net kënne agesat ginn.
Et wier wichteg wann de Kapitän vun der FLH Selektioun e Sonndeg dobei wier well d'Rout Léiwen schonn am Virfeld vun der Qualifikatioun mat  Verletzungen geplot waren.

© Serge Olmo