An enger spannender Halleffinall wënnt den HC Bierchem knapps mat 27:26 géint d'Red Boys an Esch wënnt mat 30:26 géint Diddeleng.

HB Esch - HB Diddeleng 30:26 (13:11)

An den éischte Minutten hu sech béid Ekippe schwéier gedoen fir de Wee an de Gol ze fannen. No 2 Minutten konnt den Escher Golkipper dann och direkt e 7-Meter halen wat natierlech net schlecht fir d'Confiance ass. No ronn 3 Minutten war dann awer déi éischt kéier de Ball fir déi Escher am Filet duerch e Gol vum Zekan.

Mee och an de Minutten dono sollt de Ball de Wee an de Gol net all ze oft fannen wat engersäits un onglécklech Ofschlëss mee anerersäits och u staark Paraden vun de Golkipperen zeréck ze féieren ass. No 10 gespillte Minutten stoung et domadder just 3:2 fir Esch.

An der 12. Minutt huet den Tom Krier awer en Zeeche gesat wéi en de Ball spektakulär hannert sengem Réck an de kuerzen Eck geschoss huet. Dono sinn d'Goler dann och nees méi liicht gefall. Esch war déi liicht besser Ekipp mee den HBD huet sech awer net sou einfach ofhänke gelooss. Allerdéngs haten déi Escher ab der 15. Minutt awer eng gutt Phase a konnten hir Féierung no 20 Minutten op 10:7 ausbauen.

Béid Golkipperen waren iwwerdeems weider komplett op der Héicht a konnte mat weidere gudde Paraden op sech opmierksam maachen. Mat engem 13:11 fir Esch ass et schlussendlech an d'Paus gaangen.

© Gilles Tricca

Mat vill Elan ass Esch aus der Paus komm a konnt innerhalb vu kuerzer Zäit 4 Goler schéissen sou dat se no 33 Minutten mat 17:11 a Féierung louchen. Dëst war eng geféierlech Phase fir déi Diddelenger fir net ze wäit a Réckstand ze geroden. Mee déi Diddelenger hunn eng Reaktioun gewisen a sinn nees op 2 Goler erukomm sou dat et mat engem Avantage vun 23:21 fir Esch an déi lescht 10 Minutte gaangen ass.

Esch huet sech awer net huele gelooss a säi Virsprong souverän iwwer d'Zäit bruecht sou dat se mat engem 30:26 gewannen.

HC Bierchem - Red Boys 27:26 (15:12)

Béid Ekippe si gutt an de Match komm an hu vun Ufank u flotten Handball gewisen a waren net gewëllt, dem Géigner iergendeppes ze schenken. Och d'Golkipper waren direkt op der Héicht an hu schéi Parade gewisen, sou datt et no 16 Minutten 8:8 stoung. D'Red Boys konnte sech an der Ufanksphase eng kéier kuerz eng Féierung vun 2 Goler erausspillen, mee mat zwee séieren Ugrëff konnten déi Bierchemer dësen nees séier ophuelen.

No ronn 25 Minutte waren et dann awer déi Bierchemer, déi duerch e puer staark Goler sech bësse konnten ofsetzen nodeems déi Déifferdenger sech schwéier mat der Bierchemer Defense gedoen hunn an direkt e puer Ugrëff net konnten a Goler ëmwandelen. Sou konnt sech zu dësem Ament den HCB bis op 14:10 ofsetzen.

An de Minutten dono krute sech déi Déifferdenger nees e bësse gefaangen a konnten nees bis op 2 Goler erukommen, mee no engem weidere Gol vun de Bierchemer ass et du mat engem 15:12 an d'Paus gaangen.

© Gilles Tricca

No der Paus waren et dann awer déi Déifferdenger déi besser aus de Kabinne komm sinn an de Bierchemer et mat enger méi aggressiver Defense schwéier gedoen hunn. No ronn 38 Minutten hate se de Réckstand dann och nees opgeholl an et stoung 17:17. Mat 2 schnelle Goler konnten sech déi Bierchemer awer nees e Virsprong erausspillen.

An dëser Phase huet de Golkipper vun den Déifferdenger, de Mikkel Moldrup, mat zwou wichtege Paraden seng Ekipp virun engem méi héiche Réckstand gerett a soumat konnten se bis op 1 Gol um HCB dru bleiwen. Bierchem ass awer déi liicht besser Ekipp bliwwen a konnte sech 7 Minutte viru Schluss nees mat 25:21 ofsetzen. Mee och no dësem Réckstand hate sech d'Red Boys nach net opginn a sinn 2 Minutte viru Schluss nees bis op 1 Gol erukomm.

An de leschte Sekonnen konnt de Golkipper vun de Bierchemer e Schoss vun de Red Boys paréieren, gewanne soumat knapps mat 27:26 a stinn an der Finall.