An engem héichklassege Match haten déi Escher um Enn dee längeren Otem a sou kréine si sech an der Coque zum Coupegewënner.

Um Samschdeg koum et an der Coque zu der Finall an der Coupe vum nationalen Handball. Hei war et den HC Bierchem, dee géint den HB Esch huet missen untrieden. Um Enn konnte sech déi Escher mat enger 34:26-Victoire den Titel sécheren. An der Paus stoung et nach 15:15 gläich.

Esch hat sech och zejoert den Titel geséchert. Et ass deen 8. an der Veräinsgeschicht.

E Sonndeg ass dann d'Finall vun den Dammen. Hei kritt et Dikrech mat Diddeleng ze dinn. Dir kënnt de Match vu 17.30 Auer un am Livestream op RTL.lu suivéieren.

De Resumé vum Match

Et war vun Ufank un eng ganz enk Partie, an där keng Ekipp sech ofsetze konnt. No 6 Minutten an 20 Sekonne louch Bierchem knapp mat 4:3 am Avantage, ma bis zur 16. Minutt war de Score op en Neits erëm equilibréiert, hei stoung et 8:8 gläich.

Bei enger excellenter Ambiance an der Coque konnte béid Golkipper a vollen Zich iwwerzeegen an hir Faarwen des Ëftere virun engem Réckstand retten. An engem gudde Match op héijem Niveau stoung et no 19 Minutten 11:10 zu Gonschte vun de Bierchemer, ma bis d'Hallschent war de Score op en Neits ausgeglach, et goung mat engem 15:15-Remis an d'Kabinnen.

Nom Téi war et dat selwecht Bild. Béid Ekippen hu mat héijem Tempo agéiert an de Supporter weiderhin ee spektakuläre Match gebueden. Déi éischt méi däitlech Avance gouf et an der 39. Spillminutt. Hei waren et déi Bierchemer, déi sech beim Score vun 20:17 den éischten Dräi-Punkten-Ecart séchere konnten. Dës Avance sollt allerdéngs net vu laanger Dauer sinn. Ronn 14 Minutte viru Schluss konnten déi Escher d'Partie dréinen a sech hirersäits eng Zwee-Punkten-Avance erausspillen. Esch war duerno besser am Match, a sou hate si beim Stand vu 25:22 10 Minutte viru Schluss op en Neits eng gréisser Avance. 6 Minutte virum Schluss war d'Entscheedung dunn och gefall an Esch war mat enger 4-Punkten-Avance scho mat engem Been am Zil. Virun allem de Martin Muller konnt no senger Awiesslung vollkommenst iwwerzeegen.

Um Enn hat Bierchem net méi vill dogéint ze setzen a sou ass den HB Esch no der 34:26-Victoire den neien an ale Coupegewënner.