Schonn e Samschdeg war bei den Hären an Dammen den Optakt vun de Playoffen am nationalen Handball.

E Sonndeg war nach eng Partie vum 1. Spilldag am Lëtzebuerger Handball-Championnat bei den Hären. Hei konnte sech d'Red Boys géint Käerjeng behaapten. Schonn e Samschdeg waren d'Dammen an och d'Häre fir den Optakt vun de Playoffen am Asaz..

Hären-Handball

Red Boys - HB Käerjeng 38:29 (16:16)

Déifferdeng wollt an der eegener Hal géint d'Gäscht vu Käerjeng iwwerzeegen. D'Formatioun aus der Brauereistad huet awer vun Ufank u gutt dogéint gehalen a sou war et an den Ufanksminutten eng offensiv inspiréiert Partie vu béide Säiten. No bal 25 Minutte war et en ausgeglachenen 13:12 fir Käerjeng, dat nodeems déi Déifferdenger virdrun e Lach vun 3 Goler erausspille konnten. Beim Stand vun engem equilibréierte 16:16 goung déi 1. Hallschecht op en Enn.

Dono war et d'Lokalekipp, déi besser aus de Kabinne koum. Eng 15 Minutte viru Schluss war ee mat 3 Goler am Avantage a konnt dëse bis zum Schluss souguer nach däitlech vergréisseren. Laang ware béid Ekippe gläich staark, ma um Enn haten déi Déifferdenger awer méi Kären am Tank, fir d'Partie schliisslech géint den HB Käerjeng souverän ze gewannen.

HC Bierchem - HB Diddeleng 24:26 (11:11)

Béid Ekippe si gläich staark an de Match gestart sou dat tet no ronn 15 Minutten 5:5 stoung. Dono hunn déi Bierchemer dann awer opgedréint a konnte sech e Virsprong vu 4 Goler erausspillen. Mee déi Diddelenger hu sech awer nees erkritt a sinn nees un déi Bierchemer erukomm sou dat et mat 11:11 an d'Paus gaangen ass. Flotten Handball war et awer net dee béid Ekippe gewisen hunn. Och no der Paus war et nach ëmmer kee gudden Handball, mee trotz allem awer spannend wëll et immens enk war. An der Mëtt vun der zweeter Hallschent konnten sech déi Diddelenger awer bëssen ofsetzen an haten en Avantage vun 3 Goler. Deen konnt Bierchem dann och net méi ophuelen an Diddeleng wënnt mat 26:24.

HB Esch - CHEV Dikrech 36:20 (17:6)

Vun Ufank un waren déi Dikrecher géint de Coupe-Gewënner ënnerleeën an haten net vill entgéint ze setzen. No ronn 14 Minutten hat de CHEV just 2 Goler markéiert a louch mat 2:8 am Réckstand. Bis d'Paus sollt Esch säi Virsprong weider ausbauen, sou datt an der Paus mat 17:6 am Fong schonn aller kloer war. An no der Paus huet sech dann och näischt méi geännert ausser dat den Avantage fir déi Escher weider ugewuess ass a mat 36:20 gewannen.

Dammen-Handball

HB Diddeleng - HB Museldall 21:22 (9:8)

E Sonndeg den Owend konnten d'Damme vum HB Museldall an d'Forge du Sud bei den HB Diddeleng gewanne goen.

HB Käerjeng - HC Standard 31:19 (16:10)

Den HB Käerjeng hat net vil Problemer mam Standard a wënnt kloer mat 31:19 nodeems se schonn an der Paus en Avantage vu 6 Goler haten.

CHEV Dikrech - Red Boys 46:27

Och den zweete Match vum Dag war ganz däitlech an d'Red Boys haten hei näischt géint Dikrech entgéint ze setzen.