De japanesche Ministerpresident Shinzo Abe huet um Dënschdeg matgedeelt, datt d'Olympesch Spiller zu Tokio op d'nächst Joer verluecht ginn.

Den Drock gouf um Enn dann awer ze grouss. Den IOC an Zesummenaarbecht mat der japanescher Regierung ass en Dënschdeg net méi dolaanscht komm, fir d'Olympesch Summer Spiller zu Tokio op 2021 ze verleeën.

Olympesch Spiller 2021 / Reportage Jeff Kettenmeyer

Fir vill Leit ass dëst eng Decisioun, déi schonns hätt misste virun e puer Woche geholl ginn. Bis virun zwee Deeg hat den internationalen olympesche Comité no baussen ëmmer den Androck gemaach, fir weider un Olympia dëst Joer festzehalen.

Datt wéinst der Corona-Epidemie dat gréisste Sportevent vun der Welt op 2021 verluecht gouf, ass fir de President vum COSL, André Hoffmann, déi absolut richteg Decisioun.

Den André Hoffmann: "Jo ech mengen schonn, datt all Mënsch gesinn huet, datt et ganz schwiereg géif ginn, fir dat ze organiséieren. Et ass allerdéngs weder fir d'Japaner nach fir den IOC eng einfach Decisioun, dat muss een och verstoen. Den verständlechen Drock vun der Ëffentlechkeet an de Verbänn ass awer esou grouss ginn, datt een huet missten handelen."

Virun allem vis-à-vis vun all de Sportler, déi den Ament weltwäit net kënnen trainéieren, ass et déi richteg Decisioun fir et op 2021 an net just ëm e puer Méint ze verleeën.

Den André Hoffmann: "Wann ech haut net weess, wéi ech mech ka qualifizéieren an och net trainéiere kann, dann ass dat an e puer Méint net ze behiewen. Dofir sinn ech frou, datt et op d'nächst Joer verluecht ass, och am Sënn vum Sportler, fir datt jiddereen déi selwecht Konditiounen huet."

Och d'Paralympics goufen ëm ee Joer verréckelt. De Lëtzebuerger Paralympics-Comité begréisst d'Decisioun, d'Spiller ze verréckelen. Allerdéngs ass een der Meenung, dass een dëst schonn hätt éischter kënnen decidéieren.