Fir d’Patrizia van der Weken kann all klengen Detail, souwuel an der Preparatioun, wéi och wärend der Course, eng grouss Roll spillen. Dat gëllt souwuel fir déi grouss Rendez-vousen, wéi och fir déi méi kleng, wéi d’Indoorschampionnat e Sonndeg an der Coque. Néng Honnertstel ass d’Sprintspezialistin vum 60 Meter Indoor-Weltrekord ewech. Wat néng Honnertstel Differenz op der Pist bedeiten, dat kann ee sech nëmme schwéier virstellen.
Mat 7.01 Sekonnen hat d’Patrizia van der Weken de leschte Weekend a Polen den drëttbeschte Chrono weltwäit fir dës Indoor-Saison realiséiert. Dem Patrizia säin Trainer war mol net iwwerrascht iwwert d’Performance déi vergaange Woch a Polen. Wärend dem Indoor-Championnat, huet d’Sportlerin vum Joer, déi aktuell exzellent Form confirméiert. Aus engem haarden Training eraus ass d’Sprinterin en exzellente Chrono iwwer d’60-Meter gelaf an huet ouni spezifeschen Training op den 200 Meter en neien nationale Rekord opgestallt. Elo bleiwen nach dräi Woche bis zur Indoor-Weltmeeschterschaft. Schéi wier et, wa bei déi zwou Medaile vun der vergaangener Saison nach eng derbäi kéim.
