Vill Sportler wäerte sech freeën: vu e Méindeg u sinn nees all d'Sportaarten erlaabt, déi bausse kënne praktizéiert ginn.

Ënner der Konditioun, datt et kee Kierperkontakt gëtt. Et dierfe keng Kompetitiounen ofgehale ginn, keng Spectateuren nokucken an d'Duschen a Vestiairë mussen zoubleiwen. Fir vill Veräiner dierft et nawell zolidd Aarbecht sinn, dës Mesuren ëmzesetzen. Den Tennisclub Houwald huet souguer schonn an der Ouschtervakanz ugefaange mat plangen, fir esou séier wei méiglech d'Dieren nees opzemaachen.

Wéi déi éischt Unzeeche vun engem Deconfinement komm sinn, huet den TC Houwald direkt reagéiert an schonn ugefaange mat plangen, wéi ee vereenzelt Consignë kéint en Place setzen. Masken an Desinfektiounsmëttel goufe schonn am Virfeld organiséiert a Pläng sinn ausgeschafft ginn, wéi een déi 750 Memberen, déi de Veräin zielt, op den Terrain kéint ënnerbréngen.

Um Ufank vum Confinement war Nofro fir Tennis ze spillen net grouss, dat huet sech zanterhier awer geännert. Zanter Mëtt Abrëll koumen ëmmer méi Demanden eran, fir nozefroen, wéini een Tennisrackett nees kéint an de Grapp huelen.

"Mir krute Reaktioune vun Leit, déi frou sinn, dass et elo nees ugeet an déi zu hirer normaler Stonn spillen. Et ass esou, dass déi en Abo an der Hal hunn, mir op en Outdoor-Terrain geluecht hunn, dass jiddereen nees ka spillen. Mir ginn dovunner aus, dass all Spiller kënnt, fir Tennis ze spillen, wann d'Wieder da gutt ass", sot de Markus Stegmann, President vum TC Houwald.

E Freideg krut de Club d'Recommandatioune vun der Tennisfederatioun geschéckt, déi de Veräin zousätzlech huet missen ëmsetzen. Aus deene geet ervir, dass de Club garantéiere muss, dass Bänke 4 Meter auserneen sinn an Händsche musse bei den Ofzéimatte sinn, fir der elo nëmmen 2 ze nennen.

"Och fir den Training usech hunn Traineren alleguerten Kierfercher, déi Schüler kënne benotzen, fir dass Traineren de Ball net mussen upaken. An Trainere kréien Desinfectanten, fir déi Saachen ze desinfizéieren, déi benotzt goufen", sou nach de Markus Stegmann.

Aus der Sicht vum TC Houwald ass ee frou, e Méindeg nees kënnen d'Dieren opzespären. De Club ass wuel eng ASBL, zielt awer 10 Salariéen. Duerch d'Hëllef vum Staat konnten dës Paien weider bezuelt ginn, allerdéngs sinn aner Recetten ewechgefall. An zwar de Loyer vun der Brasserie an dem Sportsgeschäft.

"Et ass nämlech esou, dass mir op déi Rentréeën ugewisen sinn, fir eis Kreditter ze rembourséieren vun all deem, wat als Anlag hei steet, wat mir mat kofinanzéiert hu mat der Gemeng. Fir eis ass et extrem wichteg, dass et elo erëm lass geet, dass et och ekonomesch an finanziell fir eis opgeet" huet de Markus Stegmann betount.

Federatioun huet sech bei anere Länner inspiréiert

A Rheinland-Pfalz ware jo schonn zanter dem 20. Abrëll eng Rei Sportaarten dobaussen nees méiglech. Dat ass vun e Méindeg un dann och zu Lëtzebuerg de Fall. 32 Sportaarte sinn nees erlaabt, natierlech ënner Reegelen, déi duerch de Coronavirus hu misse festgeluecht ginn. Am Lëtzebuerger Tennis hat ee sech an de leschten zwou Wochen schonn op theoreteschem Plang op d'Reprise preparéiert.

Mesuren am Tennis / Reportage Franky Hippert

De Sportministère hat d'Federatiounen Enn Abrëll gefrot, e Konzept eranzeginn. D'FLT huet sech dunn un aneren europäesche Länner ëmgekuckt, an dann och esou e Pabeier ausgeschafft, erkläert den FLT-President Claude Lamberty:

Hu mer eis vill un de Schwäizer, den Éisträicher, den Däitschen, de Fransousen an de Belsch inspiréiert. Et sinn kloer Reegele fir d'Veräiner, d'Trainer an d'Spiller. Déi Reegele mussen och aushänken kommen.

De President vun der Lëtzebuerger Tennisfederatioun gëtt dann e puer Beispiller, wéi déi Reegelen ausgesinn:

Et ass méiglech, fir mat engem Trainer an zwee Spiller ze spillen, respektiv Simple an enger éischter Phase. Eng kleng Ouverture gëtt et awer, wann een Dubbel spillt an et kënnt eng Koppel aus dem nämmlechten Haus, an et spillt een géint d'Koppel aus engem aneren nämmlechten Haushalt.

Un der Veräiner war an ass et dann elo, dat ëmzesetzen, de Markus Stegmann vum Tennis Club Houwald:

Jo mir hunn effektiv fir all Trainer an Terrain Masken, Desinfektioun an Händchen zu Dispositioun. An d'Trainer hunn och all Kierfercher, esou datt d'Spiller de Ball net mussen upaken.

Ma och d'Lëtzebuerger Spëtzesportler wei d'Mandy Minella sinn natierlech frou, datt si no ronn 2 Méint, emol nees eng Raquette a de Grapp kënnen huelen;

Jo ech spillen e Mëttwoch erëm fir déi éischte Kéier. Ech mengen, datt ech 2 bis 3 Mol d'Woch trainéieren. Ech trainéieren dës Woch mam Eléonora, dann kënne mer kucken, wéi schwéier et eis fält, nees Bäll ze schloen.

An dëser Phase weisen d'Federatioune vun deene Sportaarten, déi een nees dobaussen ka maachen, natierlech op d'Eegeverantwortung vun all Eenzelen hin, fir sech un d'Reegelen ze halen, déi ausgeschafft goufen.