Am drëtte WM-Qualifikatiounsmatch hunn d'Lëtzebuerger trotz enger staarker Leeschtung mat 28:29 géint Italien de Kierzere gezunn.

No der Victoire op de d'Färöer Inselen an dem Remis géint Lettland gouf et fir d'Lëtzebuerger Hären e Sonndeg an der WM-Qualifikatioun eng Defaite géint Italien.

Wéi ze erwaarden, sinn d'Italiener mat vill Tempo an de Match gestart a krute sech fréi eng gewësse Féierung opgebaut. Lëtzebuerg huet sech awer och net verstoppt a sou ass een tëschenduerch nees bis op ee Gol ugeréckt. Mat engem Spillstand vun 18:14 aus der Siicht vun den Italiener ass et dann no 30 Minutten an d'Paus gaangen.

Nom Säitewiessel sinn d'Lëtzebuerger dann awer immens gutt aus de Vestiairë komm. Aus engem Réckstand vu véier Goler ass et gelongen auszegläichen an déi italienesch Ekipp domat ënner Drock ze setzen. Bis zum Schluss war et en oppene Match, deen Italien mat engem knappen 29:28 fir sech entscheede konnt.

An der WM-Qualifikatioun, déi op de Färöer Insele gespillt gouf, kënnt déi Lëtzebuerger Handballnationalekipp schlussendlech op déi 3. Plaz am Grupp 4, wat d'Eliminatioun bedeit.

An der leschter Partie hunn d'Färöer Insele mat 26:19 géint Lettland gewonnen.
D'Färöer Inselen an Italien kommen also en Tour virun.