Iwwerdeems ka Rëmeleng an der Relegatioun géint Réiden wannen. An der AXA-League bei den Damme goufen et Victoirë fir Diddeleng an de Museldall. 

Dëse Weekend war am Lëtzebuerger Handball-Championnat bei den Dammen den 12. Spilldag. Iwwerdeems stoung bei den Hären de 6. Spilldag an der Relegatioun um Programm.

Härenhandball

Relegatioun

Um Sonndeg hat Péiteng de Standard op Besuch. Et war e wichtege Match fir béid Ekippen, wou déi Stater als Leader an de Match goungen. D'Ekipp vum Trainer Martin Hummel huet vun Ufank un näischt ubrenne gelooss an déi Péitenger schonn an der éischter Hallschent mat aacht Goler op Distanz gehalen. Och an den zweeten drësseg Minutte konnt den HBP näischt géint d'Ekipp vu Bouneweg ausriichten a verléiert zum Schluss mat 23:34. De Standard bleift domat Éischten an der Tabell an huet déi nächst Woch den nächste Spëtzematch géint Dikrech virun der Broscht.

E Samschdeg ware schonn zwou Partië gespillt ginn.

Bartreng ass konzentréiert an de Match gaangen a huet sech duerch séieren Handball séier mat 12:5 konnten ofsetzen. Bis d'Hallschent sollt sech net vill um Spillverlaf änneren, sou dass Bartreng an der Paus mat 19:11 géint den HB Museldall a Féierung louch. No der Paus huet d'Lokalekipp den Uschloss net méi fonnt, sou dass de Museldall um Enn mat 26:32 géint Bartreng verléiert.

De Favorit vu Rëmeleng konnt sech vun Ufank un eng fréi Féierung erausspillen an huet dëst och bis zum Schluss verdeedege konnten. Rëmeleng gewënnt kloer zu Réiden mat 38:26.

Dammenhandball

De Chev Dikrech huet de Weekend vun de klore Victoirë fir d'Heemekippe komplettéiert. An den éischten drësseg Minutten hu si net manner ewéi 21 Goler geschoss a just eelef kasséiert an och déi zweet Hallschent goung un d'Dammen aus der Brauereistad. Déi Dikrecherinne gewanne schlussendlech mat 31:19 géint den Tabelleleschte vu Bieles an zéien no dëser Victoire mat de Red Boys an der Tabell gläich.

Um Samschdeg hunn d'Damme vum Standard misse Forfait erklären, sou dass de Match 20:0 fir den HB Käerjeng gewäert gouf.

Damme vum HB Diddeleng hu vun Ufank un de Match an d'Hand geholl an hu sech séier e klenge Virsprong erausgespillt. Dëse gouf bis d'Paus op 8 Goler ausgebaut (18:10). No der Paus sollt sech um Spillverlaf näischt änneren, sou dass sech Diddeleng an eegener Hal mat 34:19 géint Red Boys duerchsetzt.  Relativ änlech ass et op der Musel gelaf, wou den HBM Besuch vun Esch hat. Obwuel d'Damme vun Esch de Match déi éischt 15 Minutte relativ ausgeglach gestalt hunn, konnte si Mëtt vun der 1. Hallschent dem Tempo vun der Lokalekipp net méi matgoen a si mat engem Retard vu 7 Goler an d'Paus gaangen. De Museldall sollt sech no 60 Minutte verdéngt mat 33:16 géint Esch behaapten.