En Donneschdeg den Owend stoungen am nationalen Handball d'Halleffinalle vun der Coupe de Luxembourg bei den Hären um Programm.

An der Finall kënnt et zum Duell tëscht dem HB Esch an de Red Boys Déifferdeng. Esch huet Diddeleng eliminéiert, iwwerdeems d'Red Boys sech géint Bierchem duerchsetze konnten.

Final 4 am Härenhandball - Reportage vum Serge Olmo

HB Diddeleng - HB Esch 27:30

An der éischter Halleffinall koum et zum Duell tëscht dem HB Esch an dem HB Diddeleng. Den neien an ale Champion vun Esch war an den éischte Minutte wuel nach e bësse midd vun der Championsfeier, well Diddeleng ass mat engem 4:0-Laf an d'Partie gestart. Dono sinn déi Escher dunn awer wakereg ginn a konnte mat engem 8:1-Laf mat 8:5 a Féierung goen. An der Suite war d'Partie e gutt Stéck méi ausgeglach. Béid Ekippen hunn offensiv gutt agéiert an et esou der géignerescher Defense schwéier gemaach. An der Paus louch Esch mat 18:16 am Avantage.

An der zweeter Hallschent hunn déi Escher sech dunn awer selwer d'Liewe schwéier gemaach. 1 Rout Kaart an 2 Mol 2-Minutten-Strofe bannent kuerzer Zäit hunn dozou bäigedroen, datt Diddeleng d'Féierung nees iwwerhuele konnt. Et huet sech also eng spannend Schlussphas annoncéiert. Hei haten déi Escher déi besser Nerven an esou wanne si um Enn mat 30:27 a stoungen domat als éischte Finalist fest.

HC Bierchem - Red Boys Déifferdeng 32:37

An der zweeter Halleffinall koum et zum Duell tëscht dem 2. an dem 3. aus de Championnat. Deemno Red Boys Déifferdeng géint Bierchem. D'Red Boys hate virun allem an der Ufanksphas Schwieregkeeten an der Offensiv. Si hunn hei vill Chancë leiegelooss, Bierchem konnt awer zu kengem Ament richteg dovun zéien. No gutt 28 Minutte stoung et 14:14, ma an de leschten 2 Minutte vun der éischter Hallschent hunn déi Déifferdenger dunn e richteg gudde Laf gehat, esou datt si an der Paus mat 18:14 am Avantage waren.

Bierchem hat zum Ufank vun der zweeter Hallschent e schwéiere Stand. An der Offensiv si si nämlech ëmmer erëm um staarke Chris Auger am Déifferdenger Gol hänkebliwwen. Dowéinst konnten d'Red Boys hir Avance dann och weider ausbauen an hate knapp 20 Minutte viru Schluss eng Avance vu 6 Goler. Den HC Bierchem huet sech awer nach net opginn an huet nach eemol eng Schlussoffensiv lancéiert. Si sollten nach eemol op 3 Goler erukommen, ma dono hunn d'Red Boys awer nees reagéiert an hu sech hiren Ticket fir d'Finall net méi huele gelooss. Um Enn wanne si mat 37:32 géint Bierchem a stinn domat an der Finall géint Esch.