E Freideg den Owend stoungen am nationalen Handball d'Halleffinalle vun der Coupe de Luxembourg bei den Dammen um Programm.

Den éischten Ticket fir d'Finall vun der Coupe am Dammenhandball konnt sech Diddeleng sécheren. Den HBD ass am Gymnase vun der Coque senger Favoritteroll géint Réiden gerecht ginn an huet sech mat 38:17 duerchgesat.

An der Finall kritt den HBD et mat Käerjeng ze dinn. De Champion huet sech souverän mat 25:13 géint den HB Museldall duerchgesat.

Domadder sti sech e Sonndeg an der Finall déi zwou bescht Ekippe vum Championnat géintiwwer.

HB Dideleng - HC Atert Réiden 38:17 (19:6)

An der éischter Halleffinall ass de Vizechampion Diddeleng op den Underdog Réiden aus der Promotioun getraff. Séier huet een am Match gesinn, wien déi besser Ekipp ass an esou huet den HBD dann och d'Heft an d'Hand geholl. An der Mëtt vun den éischten 30 Minutte louchen déi Diddelengerinne mat 11:4 a Féierung. Bis d'Paus ass dësen Avantage op 19:6 ugewuess.

Déi zweet Hallschent huet den HBD weider säi Spill duerchgezunn a konnt de Virsprong ëmmer weider ausbauen. Um Enn gouf et eng 38:17-Victoire.

Nodeems Diddeleng de leschte Weekend de Championstitel knapp verpasst hat, hu Wirtz a Co domadder e Sonndeg d'Chance, fir d'Saison nach mat engem Titel ofzeschléissen.

HB Museldall - HB Käerjeng 13:25 (8:11)

Déi zweet Partie vum Owend war de Spëtzematch an den Halleffinallen. De Museldall ass op de Champion Käerjeng getraff. D'Damme vun der Musel hunn am Ufank vum Match gutt géint de Favorit entgéint gehalen an hu Käerjeng net wierklech dovunner zéie gelooss. Den Avantage vu Käerjeng huet tëscht engem a véier Goler variéiert. Beim Score vun 11:8 ass et an d'Paus gaangen.

Tina Welter a Co sinn an der zweeter Hallschent besser aus de Kabinne komm, hu manner Feeler gemaach an esou konnt een de Virsprong no 39 Minutten op 14:8 ausbauen. Dem Museldall ass eréischt no 10 Minutten den éischte Gol gelongen. Bei den Damme vun der Musel huet ee lues awer sécher eng gewësse Middegkeet gesinn, dat och well een net esou eng Déift am Kader huet ewéi Käerjeng an deemno net esou vill wiessele konnt. De Virsprong vum Champion ass dann och ëmmer méi grouss ginn an um Enn konnt ee sech iwwert eng 25:13-Victoire freeën.

RTL

© Serge Olmo