Déifferdeng gewënnt mat 28:27 géint den HB Esch. Bei den Damme setzt sech Diddeleng mat 27:25 géint Käerjeng duerch.

Resumé Supercup am Handball / Reportage Serge Olmo

Mam Lodyss-Supercup, deen zu Käerjeng gespillt gouf, huet den Handball déi nei Saison agelaut.

Bei den Häre gewënnt Déifferdeng den éischten Titel vun der Saison. Et war vun Ufank un en enke Match tëscht dem Champion Esch an dem Coupe-Gewënner Red Boys vun der vergaangener Saison. Keng Ekipp konnt sech bis d'Paus ofsetzen, obwuel d'Féierung ëmmer nees gewiesselt huet. Déi maximal Avance waren zwee Goler op béide Säiten. Mat 15:14 fir Esch goung et an d'Paus.

An den zweeten drësseg Minutten war et bis déi 45. Minutt dat selwecht Bild, wéi an der éischter Hallschent. Du konnte sech d'Red Boys awer eng Avance vu fënnef Goler erausspillen, déi déi Escher bis zum Enn net méi egaliséiere konnt. An de leschte Minutte gouf et nach eng Kéier spannend, well den Ecart just nach bei engem Gol louch, mee den Aldin Zekan huet den decisive Gol zum 28:27 fir seng Faarwe geworf. Op Escher Säit krut de Jacques Tironzelli an der leschter Spillminutt seng drëtt Zäitstrof a gouf mat Rout vum Terrain gesat.

Bescht Butteure waren de Jacques Tironzelli (9 Goler) an de Luca Tomassini (8 Goler) fir Esch an den Ognjen Jokic souwéi den Elledy Fernandes (béid 6 Goler) fir d'Red Boys.

Dammen

Diddeleng heescht de Gewënner bei den Dammen. Am éischte Match vum Supercup hat Diddeleng de Score opgemaach, mee d'Käerjengerinne konnte bis déi 12. Minutt e 6:0-Laf realiséieren. D'Damme vum HBD sinn awer lues a lues erukomm, sou dass et mat 11:11 an d'Paus goung.

An der zweeter Hallschent huet keng Ekipp sech richteg kënnen ofsetzen. Käerjeng war wuel konstant mat 1-2 Goler a Féierung, Diddeleng konnt awer nach ausgläichen, sou dass et no 60 Minutten 22:22 stoung. Am Siwemeter-Schéissen hat den HBD déi besser Nerven a gewënnt um Schluss mat 25:27.

Déi bescht Scorerinne waren d'Tina Welter (11 Goler) op Käerjenger an d'Joy Wirtz (9 Goler) op Diddelenger Säit.

RTL

© RTL / Serge Olmo