Den Titelverdeedeger Norwegen setzt sech géint Frankräich duerch, iwwerdeem Dänemark géint Montenegro gewënnt.

An der 1. Halleffinall war et um 17.30 Auer den Duell tëscht Dänemark a Montenegro. An der Hallschent war Dänemark mat 14:10 vir, dat virun allem well se hir Golchancen einfach méi konsequent ëmgesat hunn. Montenegro ass awer méi staark aus de Kabinne komm a konnt an der 37. Minutt ausgläichen op 14:14.

Duerno hunn d'Däninnen awer nees d'Féierung iwwerholl a sech déi och net méi huele gelooss. Si setze sech mat 27:23 géint Montenegro duerch a stinn domat an der Finall vun der Europameeschterschaft.

RTL

© AFP

An der zweeter Halleffinall stounge sech den Titelverdeedeger Norwegen a Frankräich géintiwwer. Dëst war dann zugläich och de selwechten Duell, wéi d'Finall 2020, wou Norwegen sech mat 22:20 duerchsetze konnt an den Europameeschtertitel feiere konnt.

An dëse Halleffinall waren d'Dammen aus Frankräich deemno sécherlech méi wéi motivéiert, fir sech ze revanchéieren. An den éischten 30 Minutte war et e ganz ausgeglachene Match. Just duerch eng liicht besser Trefferquote op Säite vun den Norwegerinnen konnten dës mat engem 12:11 an d'Paus goen.

Frankräich ass et an der zweeter Hallschent net méi gelongen auszegläichen, oder souguer tëschenduerch och emol a Féierung ze goen. Den Ecart louch stänneg tëscht engem an 3 Goler. No ronn 50 Minutten ass d'Spill vu Frankräich dunn agebrach... vir gouf näischt méi getraff an Norwegen huet Gol ëm Gol markéiert. Schlussendlech setzt sech den Europameeschter mat 28:20 géint Frankräich duerch an trëfft an der Finall op Dänemark.