Duerch eng 20:23-Defaite géint Anorthosis Famagusta sinn d'Red Boys am Retourmatch den 10. Dezember gefuerdert. D'Resultat ass zum Deel awer niewesächlech.

E Sonndeg gouf et am Allersmatch vun der 1/16-Finall am EHF European Cup op Zypern eng 23:20-Victoire fir Anorthosis Famagusta géint d'Red Boys Déifferdeng.

Schonn an der éischter Hallschent vun der Partie hu sech béid Ekippen op engem änlechen Niveau gewisen. Mat engem knappe Virsprong vun zwee Goler ass et sou fir déi Déifferdenger Ekipp no 30 Minutten an d'Paus gaangen. Am zweeten Duerchgang huet sech d'Blat dann allerdéngs gedréint. D'Lokalekipp aus Zypern war besser am Match a konnt de Réckstand an eng Féierung dréinen. Och wann de Virsprong net all ze grouss war ass et um Enn duergaangen, fir d'Red Boys mat enger 20:23-Defaite zréck op Lëtzebuerg ze schécken.

Ultras stiermen Déifferdenger Kabinn / Rep. Franky Hippert

Zypriotesch Ultras stiermen Déifferdenger Kabinn

Frenetesch Supporter sinn am Sport jo dacks op de Gradinen, dat wat awer e Sonndegowend op Zypern geschitt ass, ass net tolerabel. No 30 Minutte waren d'Red Boys zwee Goler vir. Et staunt een als Spiller awer net schlecht, wa wärend dem Pausentéi op eemol d'géigneresch Ultraen d'Kabinn stiermen. Dat war awer de Fall, wéi den Déifferdenger Riets-Bandspiller Dan Scheid erkläert:

"D'Securitéit ass guer net garantéiert ginn. Mir kruten d'Kabinn gestiermt, mä dat hat awer keen Impakt op d'Resultat"

Et waren awer net nëmmen d'Spiller vum Lëtzebuerger Coupegewënner déi ze spieren kruten, datt weder Securitéit nach Police de Match zu Nikosia ofgeséchert hunn:

"Et goufen och Supporter aggresséiert. Si kruten zum Deel hir Trommele geklaut, hir Fändele goufen erofgerappt, Jackette goufe geklaut. Herno war hir Sécherheet och net méi garantéiert"

D'Red Boys hunn dann och Protest ageluecht. Wat d'Defaite ugeet, muss ee sech bei der eegener Nues huelen, seet den Dan Scheid:

"Meng Analyse, d'Consignen net respektéiert... Mir wossten, datt et eng relativ grouss Ekipp ass, da muss ee mat Schnellegkeet spillen. Mir hu kee kollektiven Handball méi gespillt"

De Retourmatch ass e Samschdeg den Owend um 18 Auer zu Nidderkuer an der Hal. Zwou Saachen dierften do fir d'Red Boys Prioritéit hunn, éischtens d'Resultat vum Allersmatch ze dréinen an zweetens d'Sécherheet vu Spiller a Spectateuren esou ze garantéieren, wéi et u sech soll sinn. Béides ass en Challenge, béides ass awer och sécherlech méiglech.