En Dënschdeg sinn déi zwou lescht Aachtelsfinallen ausgedroe ginn. Hei ass Spuenien op Marokko getraff an d’Schwäiz krut et mat Portugal ze dinn.

Am zweeten Eelefmeterschéisse vun dësem Turnéier konnten d'Marokkaner sech mat 3:0 géint d'Favoritten aus Spuenien duerchsetzen.

Um Owend huet Portugal der Schwäiz keng Chance gelooss an um Enn däitlech mat 6:1 gewonnen. Domat kënnt et an der Véierelsfinall zum Duell tëscht Portugal a Marokko.

De Resumé vun de Matcher

Marokko - Spuenien 0:0 (3:0 no Eelefmeterschéissen)

Nennenswäert Chancë gouf et an der Ufanksphas vun dësem Match keng. D'Spuenier hu géint immens kompakt stoend Marokkaner ëmmer nees no Lächer gesicht, mä keng fonnt, wougéint d'"Léiwe vum Atlas" probéiert hunn, mat engem séieren Ëmschaltspill geféierlech ze ginn, allerdéngs ouni Succès. Eng gutt Geleeënheet haten d'Marokkaner kuerz virun der Paus, wéi den Nayef Aguerd aus 5 Meter eng Flank vum Sofiane Boufal knapp iwwert de Gol gekäppt huet.

Déi marokkanesch Defense war och am zweeten Duerchgang net fir d'Spuenier ze knacken: "La Furia Roja" huet sech un Hakimi & Co. weiderhin d'Zänn ausgebass. An der 5. Minutt vun der Nospillzäit gouf et du bal den 1:0 fir Spuenien, wéi den Dani Olmo e Fräistouss aus 25 Meter direkt op de Gol gezunn huet. De Yassine Bono konnt awer groussaarteg paréieren a seng Marokkaner an d'Verlängerung retten.

D'Spuenier konnten och hei d'Partie weider dominéieren an d'Marokkaner ëmmer méi am eegene Strofraum belageren. Wéi schonn an de regulärer Spillzäit, ass et den Nordafrikaner geleeëntlech awer gelongen, mat Konteren duerchzebriechen. Dat zweet Eelefmeterschéisse vum Turnéier louch an der Loft, nodeems et de Spuenier kuerz viru Schluss net gelongen ass, eng Rei gutt Chancen ze verwäerten.

De Bono konnt du mat 2 gehalene Schëss - den éischte spuenesche Penalty goung un de Potto -  brilléieren an d'Sensatioun fir Marokko perfekt maachen.

Portugal - Schwäiz 6:1
1:0 Ramos (17'), 2:0 Pepe (33'), 3:0 Ramos (51'), 4:0 Guerreiro (55'), 4:1 Akanji (58'), 5:1 Ramos (67'), 6:1 Leão (90+2’)

Scho virum Match gouf et déi éischt Iwwerraschung, well de portugisesche Superstar a Kapitän Ronaldo just op der Bänk Plaz geholl huet. Och de Cancelo vu Manchester City stoung net an der Startformatioun vum Fernando Santos, dofir hunn de Ramos an den Dalot ugefaangen.

Änlech wéi am éischte Match vum Dag goufen de Spectateuren och hei an den éischte Minutte wéineg geféierlech Aktioune gebueden. D’Schwäiz stoung héich an huet d’Portugisen ëmmer nees ënner Drock gesat, ma déi waren et awer, déi no 17 Minutten a Féierung goe konnten. Mat engem ganz stramme Schoss huet de Ramos de Ball aus der Dréiung laanscht de Sommer an de kuerzen Eck gesat, de Golkipp konnt just hannendru kucken. Portugal wollt direkt noleeën an hat duerch den Otavio an de Ramos zwou Occasiounen op den 2:0. No enger gudder hallwer Stonn war et dunn de Pepe, deen no engem Corner déi portugisesch Féierung per Kappball erhéije konnt. De Ramos hat kuerz virun der Paus nach eng Geleeënheet, ass awer um Sommer hänke bliwwen, genausou wéi de Freuler op der anerer Säit um Diogo Costa.

Och am zweeten Duerchgang hunn d’Südeuropäer den Toun uginn a konnten an der 51. Minutt nach een dropsetzen. Nees war et de Ramos, deen de Ball aus kuerzer Distanz tëscht dem Sommer seng Been am Gol ënnerbrénge konnt. Bei der Ekipp vum Fernando Santos huet alles geklappt an no engem schéin ausgespillten Ugrëff konnt de Guerreiro kuerz duerno op 4:0 erhéijen. D’"Nati" huet sech allerdéngs net opginn a konnt just e puer Minutten drop den Uschlossgol markéieren, wéi den Akanji bei engem Corner um zweete Potto vergiess gi war. D’Schwäiz huet hannen opgemaach an de Portugise Raim gelooss, wat déi direkt bestrooft hunn. Iwwer dräi Statiounen ass de Ball nees beim Ramos gelant, dee virum Gol äiskal bliwwen ass an op 5:1 erhéicht huet. Et waren dem jonke Portugis seng éischt Goler am Trikot vun der Nationalekipp, dat bei sengem drëtten Asaz. Den agewiesselte Leão huet an der Nospillzäit mat engem schéinen Ofschloss nach fir d’Schlussresultat gesuergt. No dësem dominanten Optrëtt trëfft Portugal elo e Samschdeg op Marokko.