Wéi Walfer an engem Schreiwes matdeelt, hätt ee sech esou een Urteel net erwaart, et géif een et awer akzeptéieren, och wann ee sech vill Froe stellt.

Nach déi leschte Woch hat d'Verbandsgeriicht decidéiert, datt d'Resultat tëscht Walfer a Mamer, no Protest vu Walfer, net kéint bestoe bleiwen. D'FLBB war géint dës Decisioun vum Verbandsgeriicht an Appell gaangen a krut an zweeter Instanz Recht. Domadder muss d'Partie tëscht Mamer a Walfer net nach eng Kéier gespillt ginn an och Diddeleng, déi schonn an der nächster Ronn Mamer eliminéiert haten, steet domadder sécher an der Halleffinall vun der Coupe de Luxembourg am Basket.

Walfer war direkt nom Match an Appell géint déi knapp Néierlag géint Mamer gaangen, well um Enn vun der Partie d'Auer ze spéit ugelaf ass a Mamer an der leschter Sekonn de Match gedréint huet.

Um Dag nom Urteel huet d'Walfer an engem Schreiwes Positioun bezunn. De Veräin hätt sech esou eng Decisioun net erwaart, ma et géif ee se awer akzeptéieren. Eenzeg stellt ee sech d'Fro, wéi wäit een elo hei e Präzedenzfall geschaaft huet, déi sech op de Prinzip vun der Korrektheet vun der Auer wärend engem Match auswierkt. Och stellt ee sech weider d'Fro, wisou d'Federatioun iwwert ee Mount gebraucht huet, obwuel ee méi wéi eng Kéier nogefrot huet, fir an dëser Affär iwwerhaapt emol ze tranchéieren. Wier et nämlech de korrekte Wee gaangen, wier d'Affär däitlech manner komplizéiert ginn, esou Walfer weider.