Chelsea konnt sech géint Brighton behaapten, PSG gewënnt an Ënnerzuel 2:0 bei Le Havre. Mainz huet déi éischt Néierlag ënner dem neien Trainer kasséiert.

Bundesliga

Mainz - Freiburg 0:1
0:1 Gregoritsch (70')

An enger intensiver Partie war de Michael Gregoritsch de Matchwinner an huet Mainz, mam Leandro Barreiro, déi éischt Néierlag ënner dem Interimstrainer Jan Siewert zougefüügt. Mainz hat de bessere Start, konnt seng Chancen awer net notzen. Freiburg koum eréischt no 20 Minutte richteg an de Match, hat awer och kee Gléck virum Gol. Och am zweeten Duerchgang war et eng ëmkämpft Partie, woubäi béid Ekippen de Ball net am Filet ënnerkruten. An der 70. Minutt stoung de Gregoritsch richteg a konnt den decisive Gol fir de Sportclub schéissen. Freiburg hält domat weider den Uschloss un déi europäesch Plazen, Mainz bleift am Tabellekeller.

Leverkusen - Dortmund 1:1
0:1 Ryerson (5'), 1:1 Boniface (79')

Dortmund war mat engem Paukenschlag an de Match gestart an hat Leverkusen kal erwëscht, mee duerno ass vum BVB iwwer laang Strecken näischt méi komm a Leverkusen huet e Match gemaach. E Gol vum Wirtz gouf wéinst Abseits vum VAR oferkannt. Am zweeten Duerchgang gouf et dat selwecht Bild: d'Werkself ass ugerannt, mee ass ëmmer nees um Kobel oder um Aluminium gescheitert. Eréischt de Boniface konnt 10 Minutte viru Schluss de verdéngten Ausgläich fir Leverkusen schéissen. Dortmund hat mat der leschter Aktioun d'Chance, de Match op d'Kopp ze stellen.

Augsburg - Frankfurt 2:1
1:0 Jensen (35'), 2:0 Iago (58'), 2:1 Dahmen (78',sg)

Et sollt e Resultat, géint de Spillverlaf ginn. Frankfurt war bal an allen Domänen vu Ballbesëtz iwwer Ofschlëss dominant, eenzeg op der Tafel, do wou et schlussendlech zielt, hat Augsburg d'Nues vir. D'Frankfurter sollten et einfach net fäerdeg bréngen, hir Dominanz ëmzesetzen. E gutt Beispill dofir ass dann, dat den eenzege Gol, dee si opgeschriwwe kruten, e Selbstgol vum Dahmen kuerz viru Schluss war. Virdrun haten de Jensen an den Iago d'Ekipp aus der Stad, déi fir d'Puppenkiste bekannt ass, 2:0 a Féierung bruecht. Kuerz virum 2:1 hat den Demirovic vun Augsburg den 3:0 verpasst, wéi hie vum Punkt aus net laanscht de Kevin Trapp am Frankfurter Gol koum.

Premier League

Chelsea - Brighton 3:2
1:0 Fernandez (17'), 2:0 Colwill (21'), 2:1 Buonanotte (43'), 3:1 Fernandez (65', Eelefmeter), 3:2 Joao Pedro (90'+2)

Den FC Chelsea huet d'1:4-Néierlag géint Newcastle am leschte Match gutt verquësst a mat Brighton engem direkte Konkurrent dräi Punkten opgeknäppt. Déi éischt 45 Minutte gounge praktesch komplett un d'Blues, bei deenen de Ball zweemol de Wee an de Filet fonnt hat. Kuerz virun der Paus gouf et zwee Réckschléi fir Chelsea: den Uschloss fir Brighton an déi giel-rout Kaart fir de Gallagher. Trotz der Ënnerzuel huet d'Ekipp vum Trainer Mauricio Pochettino de Match wäitgoend kontrolléiert a vun engem Eelefmeter profitéiert. Den zweete Gol fir Brighton koum ze spéit.

Liverpool - Fulham 4:3
1:0 Leno (20', Eegegol), 1:1 Wilson (24'), 2:1 Mac Alister (38'), 2:2 Tete (45'+3), 2:3 De Cordova-Reid (80'), 3:3 Endo (87'), 4:3 Alexander-Arnold (88')

Et hat laang net dono ausgesinn, mee Liverpool bleift och am siwenten Heemspill vun der Saison ongeschloen. An der éischter Hallschent, déi iwwer 57 Minutte gedauert huet, konnt Fulham zwee Mol d'Féierung vun de Reds ausgläichen. Liverpool huet och am zweeten Duerchgang den Toun uginn, mee et war Fulham, dat an der 80. Minutt iwwerraschend a Féierung goung. D'Ekipp vum Trainer Jürgen Klopp huet bis zum Schluss net opginn a konnt bannent zwou Minutten de Match zu hire Gonschten dréinen.

Manchester City - Tottenham 3:3
0:1 Son (6'), 1:1 Son (9', Eegegol), 2:1 Foden (31'), 2:2 Lo Celso (69'), 3:2 Grealish (81'), 3:3 Kulusevski (90')

Manchester City léisst op en Neits Punkte leien, wouvun Arsenal a Liverpool profitéieren. No dem fréie Schock duerch de Son, deen och fir den Ausgläich op der anerer Säit gesuergt huet, koum ManCity zu sengem gewinnten Tempospill mat ville Chancen. Eng dovu konnt de Foden verwäerten, sou dass d'Skyblues zur Paus verdéngt virlouchen. Och nom Säitewiessel huet ManCity de Match kontrolléiert, trotzdeem hunn d'Spurs aus dem Näischt den Ausgläich geschoss an hätte souguer nach ee kënnen dropsetzen. Nodeem de Grealish d'Lokalekipp nees a Féierung bruecht hat, war jidderee vun enger Victoire fir den amtéierende Champion ausgaangen, mee de Kulusevski konnt mat engem Kappball nach ee Punkt fir seng Faarwe sécheren.

Serie A

Florenz - Salernitana 3:0
1:0 Beltran (6', Eelefmeter), 2:0 Sottil (18'), 3:0 Bonaventura (56')

No dëser Victoire huet d'Fiorentina 23 Punkten um Kont a steet op der sechster Tabelleplaz. Salernitana ass weiderhin Tabelleleschten.

Sassuolo - AS Roum 1:2
1:0 Matheus Henrique (25'), 1:1 Dybala (76'), 1:2 Kristensen (82')

Et war en haart Stéck Aarbecht fir d'AS Roum an hiren Trainer José Mourinho. Sassuolo huet d'Roma an der éischter Hallschent iwwerrascht an hätten och méi héich féiere kënnen. Am zweeten Duerchgang huet Roum de Match nach méi u sech gerappt an huet och vun engem Platzverweis bei Sassuolo profitéiert. Et huet nawell 10 Minutte gedauert, bis den Dybala endlech fir Roum ausgläichen, an de Kristensen e puer Minutte méi spéit d'Féierung markéiere konnt. D'AS Roum hält domat den Uschloss un d'Top 4 an der Serie A.

Ligue 1

Le Havre - PSG 0:2
0:1 Mbappé (23'), 0:2 Vitinha (89')

PSG gewënnt trotz 80 Minutten an Ënnerzuel beim staarken Opsteiger Le Havre an distanzéiert d'Konkurrenz an der Tabell. De Paräisser Golkipp Donnarumma gouf an der 10. Minutt mat Rout vum Terrain gesat, sou dass den Ersatzgolkipp Tenas zum Asaz koum. Et war och den Tenas, dee PSG méi wéi eng Kéier de Virsprong duerch den Mbappé gerett huet. Am zweeten Duerchgang krut d'Ekipp vum Trainer Luis Enrique de Match besser ënner Kontroll, et huet awer bis zur 89. Minutt gedauert, bis si den Deckel dropgemaach huet.

Monaco - Montpellier 2:0
1:0 Minamino (9'), 2:0 Ben Yedder (90'+2)

Lille - Metz 2:0
1:0 Yazici (45'+1), 2:0 David (45'+5, Eelefmeter)

Den FC Metz huet no zwou Victoiren nees eng Néierlag mussen astiechen. Beim 0:2 zu Lille haten d'Grenats de Match laang ausgeglach gestalt kritt, waren awer an der Nospillzäit vun der éischter Hallschent net méi mam Kapp um Terrain an hunn déi zwee decisiv Goler kasséiert. Lille bleift no der Victoire an der Spëtzegrupp, wärend Metz weiderhi véier Punkte Virsprong op eng Ofstigsplaz huet.

La Liga

Almeria - Betis Sevilla 0:0