En Dënschden den Owend stoung an der Champions-League-Ligaphas den Optakt vum 6. Spilldag um Programm.

Bei Atalanta Bergamo géint Real Madrid hunn d'Spectateuren eng animéiert an oppe Partie gesinn, déi d'Spuenier um Enn mat 3:2 gewanne konnten.

No fréiem Réckstand hunn d'Bayern sech däitlech géint Shakthar Donezk duerchgesat, an och de PSG hat keng Problemer zu Salzburg.

Spéit Victoirë gouf et iwwerdeems fir Leverkusen géint Inter Mailand a fir Aston Villa zu Leipzig. Donieft huet Brest sech knapp géint de PSV Eindhoven behaapt, wärend Bruges géint Sporting mat 2:1 gewonnen huet.

Um fréien Owend gouf et tëscht Zagreb a Celtic keng Goler, Liverpool konnt sech dogéint 1:0 zu Girona duerchsetzen a steet domat weider ouni Punktverloscht un der Tabellespëtzt.

Champions League/Reportage Jeff Kettenmeyer

Atalanta Bergamo - Real Madrid 2:3
0:1 Mbappé (10'), 1:1 De Ketelaere (45+2', Eelefmeter), 1:2 Vincius (56'), 1:3 Bellingham (59'), 2:3 Lookman (65')

All d'Goler aus dem Match Atalanta - Real Madrid
De Real konnt eng spannend Partie mat 5 Goler fir sech entscheeden.

Virun der Partie war Atalanta eng vu just nach dräi ongeschloenen Ekippen an dëser Champions-League-Saison, Real stoung no dräi Néierlagen aus fënnef Matcher ferm ënner Drock. D'Visiteuren hu vun Ufank u gedréckt a sou war et no 10 Minutten den Mbappé, deen no enger gudder Beweegung den 1:0 markéiere konnt.

Et war weiderhi vill Zuch am Match, an op béide Säiten hunn Mbappé a Lookman gutt Chancen op den zweete Gol leie gelooss. Den De Ketelaere gouf e puer Mol a villverspriechend Situatioune bruecht, d'Defense vum Real hat awer ëmmer e Fouss dotëscht. Atalanta huet no an no d'Kontroll vum Match iwwerholl an huet vill Ballverloschter vun de "Kinnekleche" provozéiert, richteg geféierlech ass et awer virum Courtois sengem Gol net ginn.

No 35 Minutten huet den Mbappé missen ugeschloe vum Terrain a gouf vum Rodrygo ersat, e puer Minutten drop huet de Rüdiger d'Chance op den 2:0 net genotzt. An der Nospillzäit vun der éischter Hallschent huet den Tchouaméni dunn de Kolasinac am Strofraum zu Fall bruecht, wouropshin et Eelefmeter gouf. Den De Ketelaere huet sech der Saach ugeholl an äiskal zum verdéngten 1:1 verwandelt.

No der Paus ass Atalanta weider déi dominant Ekipp bliwwen an hat duerch de Lookman e geféierlechen Ofschloss. Kuerz drop war et awer op der anerer Säit de Vinicius, deen duerch d'Mathëllef vum Ederson fräi virum Gol opgedaucht ass a seng Faarwen nees a Féierung brénge konnt.

Just e puer Minutten drop sollt et nach méi déck fir Bergamo kommen. De Bellingham hat no engem wäite Ball just nach den de Roon viru sech, deen hie stoe gelooss huet a sou fir den 3:1 zu Gonschte vun de Madrilene suerge konnt. Ma d'Lokalekipp huet sech net opginn a weider no vir gespillt, soudass de Lookman no enger gudder Stonn nees verkierze konnt. Hien hat sech géint de Vazquez duerchgesat an dem Courtois mat engem Schoss an de kuerzen Eck keng Chance gelooss.

Den Titelverdeedeger huet d'Partie du besser geréiere kënnen an hat och e puer Geleeënheeten op d'Entscheedung, déi awer ongenotzt bliwwe sinn. An der Schlussphas huet d'Lokalekipp alles probéiert fir nach ee Punkt zu Bergamo ze halen, de Retegui huet an der leschter Minutt awer déi grouss Chance op den 3:3 leie gelooss, woumat Real sech déi éischt Punkten op friemem Terrain séchert.

Déi bescht Zeenen aus dem Match Atalanta - Real Madrid
D'Partie hat nieft de 5 Goler eng Rei weider Occasiounen ze bidden.

Girona - Liverpool 0:1
0:1 Salah (63', Eelefmeter)

De Resumé vum Match Girona - Liverpool
Liverpool konnt sech duerch en Eelefmeter vum Salah duerchsetzen a bleift weider ouni Punktverloscht.

Dinamo Zagreb - Celtic Glasgow 0:0

De Resumé vum Match Dinamo Zagreb - Celtic Glasgow
Mat engem 0:0-Gläichspill hunn d'Ekippe sech getrennt.

Bayer Leverkusen - Inter Mailand 1:0
1:0 Mukiele (90')

RB Leipzig - Aston Villa 2:3
0:1 McGinn (3'), 1:1 Openda (27'), 1:2 Duran (52'), 2:2 Baumgartner (62'), 2:3 Barkley (85')

D'Resuméë vun de Matcher Leverkusen - Inter a Leipzig - Aston Villa
Leverkusen an Aston Villa konnte béid no spéide Goler eng Victoire feieren.

Bruges - Sporting CP 2:1
0:1 Catamo (3'), 1:1 Quaresma (24', Selbstgol), 2:1 Nielsen (84')

Shakthar Donezk - Bayern München 1:5
1:0 Kevin (5'), 1:1 Laimer (11'), 1:2 Müller (45'), 1:3 Olise (70', Eelefmeter), 1:4 Musiala (87'), 1:5 Olise (90+3')

D'Resuméë vun de Matcher Bruges - Sporting a Shakthar - Bayern München
Sporting huet zu Bruges verluer an d'Bayern konnten no fréiem Réckstand nach däitlech gewannen.

RB Salzburg - PSG 0:3
0:1 Ramos (30'), 0:2 Mendes (72'), 0:3 Doué (85')

Stade Brest - PSV Eindhoven 1:0
1:0 Le Cardinal (43')

D'Resuméë vun de Matcher Salzburg - PSG a Brest - PSV Eindhoven
Déi zwou franséisch Ekippe PSG a Brest konnte sech dräi Punkte sécheren.

All d'Resultater am Iwwerbléck
Klickt hei, fir op d'Resultater, d'Tabell, d'Statistiken an d'Ekippe vun der Champions League ze kommen.