RTL - WM-Quali-Auslousung: Rout Léiwen treffen op d'Slowakei, Nordirland an op Däitschland oder Italien

D'Lëtzebuerger Futtballnationalekipp ass am Grupp A.

E Freideg an der Mëttesstonn war zu Zürich an der Schwäiz den Tirage vun de Gruppe fir déi nächst Qualifikatioun fir d’Futtball-Weltmeeschterschaft 2026 an den USA, Kanada a Mexico. D'WM an zwee Joer gëtt fir d'éischte Kéier mat 48 Ekippe gespillt.

D'Lëtzebuerger Futtball-Nationalekipp kritt et am Grupp A mam Gewënner aus der Véierelsfinall-Partie an der Nations League Däitschland géint Italien ze dinn. Weider Géigner sinn d'Slowakei an Nordirland. Fir de Lëtzebuerger Nationalspiller Laurent Jans ass dëst e ganz schwéiere Grupp. "Et muss eis bewosst sinn, datt dat ee ganz schwéiere Grupp ass, dee mir do erwëscht hunn. Et ass net evident, do Punkten ze kréien." Dat lescht Duell mat eisen däitschen Noperen geet zeréck an d‘Joer 2006. Déi lescht Partie géint Italien ass 10 Joer hir. D’Virfreed op déi zwee Matcher géint eng vun deenen groussen zwou Natiounen ass natierlech grouss.

Wat sinn d'Reegele vun der Zéiung?

54 europäesch Natioune ware fir d'Auslousung op 5 Dëppen opgedeelt. Am Ganze ginn et zwielef Gruppe vun A bis L. D'Gruppen A bis F bestinn aus véier Ekippen an d'Gruppe G bis L aus fënnef. Déi zwielef Gruppenéischt qualifizéiere sech direkt, déi véier weider Plaze vun de 16 europäesche Startplaze ginn duerch e Playoff ermëttelt. Do spillen déi zwielef Gruppenzweet an déi véier beschtplacéiert Gruppegewënner aus der Nations League, déi nach net qualifizéiert sinn.

D'Gruppephas vun der WM-Qualifikatioun (Aller- a Retourmatcher) fänkt am Mäerz un an dauert bis November 2025, de Playoff gëtt am Mäerz 2026 gespillt. D'Gruppe mat 5 Ekippe starten am Mäerz an déi mat 4 Ekippen eréischt am September.