Mat enger impressionanter Ophueljuegd huet déi fréier däitsch Nummer 1 d'Finall awer nach gewonnen. D'Spectateuren hunn e spannende Match gesinn.

Et war déi véiert Editioun vum Luxembourg Ladies Tennis Masters an der Coque. An der dësjäreger Finall konnt sech d'Angelique Kerber 1:6, 6:3 an 10:7 géint d'Alizé Cornet duerchsetzen.

Am éischten Duerchgang hat d'Franséisin kloer d'Iwwerhand. Si konnt sech géint d'Däitsch zwee Breaks sécheren an de Saz kloer 6:1 gewannen. D'Kerber huet am zweete Saz zu hirem Spill fonnt.

Nom 6:3 gouf de Match am Tiebreak decidéiert, wou d'Kerber hir Géignerin phaseweis iwwer den Terrain gejot huet an um Enn 10:7 gewonnen huet. D'Däitsch huet sech an de leschte véier Méint no der Gebuert vun hirem Kand extra fir dësen Tournoi an eng Toppform bruecht a gouf dofir mam Titel belount.

Angelique Kerber / © Roland Miny
Alize Cornet / © Roland Miny
Showmatch vum Gilles Kremer, Daniela Hantuchova, Mandy Minella a Gilles Muller / © Roland Miny
© Roland Miny
© Roland Miny
Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Am Virfeld vun der Finall hunn d'Lëtzebuerger Gilles Muller, Gilles Kremer a Mandy Minella zesumme mat der Ambassadrice vun dem Turnéier Daniela Hantuchova e Showmatch am Dubbel zum Beschte ginn.

Am Kader vun de Luxembourg Ladies Tennis Masters hat RTL d'Méiglechkeet, e méi laangen Interview mam Angelique Kerber opzehuelen. Dësen ass vun e Méindeg un am RTL-Sport-Podcast "Drëtt Hallschent" ze fannen.

All d'Fotoe vun de Luxembourg Ladies Tennis Masters fannt Dir hei.

D'Directrice vun de Luxembourg Ladies Tennis Masters Dan Maas am Interview
Et bléckt een op eng erfollegräich 4. Editioun zeréck.