6. Spilldag an der Nations LeagueDäitschland deklasséiert Holland 5:0 a spréngt op déi éischte Plaz, Schwäiz souverän

Steven Milbert
E Méindeg stoung d'Suite vum sechsten a leschte Spilldag an der Nations-League-Gruppephas um Programm. Ënnert anerem huet Däitschland géint Holland gespillt.
Däitschland huet Holland keng Chance gelooss.
Däitschland huet Holland keng Chance gelooss.
© Foto von ODD ANDERSEN / AFP

Nodeems d'Rout Léiwe schonns am spéiden Nomëtteg am Asaz waren a sech mat 0:3 géint Island hu misse geschloe ginn, stoungen e Méindeg den Owend nach weider Matcher an der Nations-League-Gruppephas um Programm. Fir dat däitlechst Resultat huet dobäi Däitschland mat enger 5:0-Victoire géint Holland gesuergt a sech domadder d'Gruppevictoire geséchert. An der Liga B konnten d'Schwäiz mat 4:0 géint Schottland a Slowenien mat 3:0 géint Nordmazedonien gewannen. Iwwerdeems huet d'Slowakei hir Campagne ouni Defaite ofgeschloss, wärend d'Färöer Inselen a Litauen hir lescht Matcher gewanne konnten.

Liga A

Am Grupp A ka sech Däitschland mat 5:0 géint Holland duerchsetzen. Däitschland huet am Berliner Olympiastadion eng staark éischt Hallschent géint Holland gewisen. D'Ekipp vum Jürgen Klopp huet vun Ufank un de Match dominéiert a mat héijem Pressing probéiert, d'Gäscht ënner Drock ze setzen. D'Hollänner stoungen dogéint defensiv kompakt an hunn ëmmer nees op séier Kontere gelauert. Esou hat de Malen an der 26. Minutt déi grouss Chance op d'Féierung, mä den Hollänner huet eng Flank vum Gakpo aus kuerzer Distanz mam Kapp nieft de Gol gesat. Duerno ass Däitschland ëmmer méi geféierlech ginn a war an der 32. Minutt duerch de Scherhant ganz no um 1:0, mä säi Schoss aus der Dréiung ass um Potto gelant. Néng Minutte méi spéit huet den Däitschen et dunn awer besser gemaach. No enger Virlag vum Kimmich huet de Scherhant de Ball op der lénker Säit ugeholl, ass no banne gezunn an huet dëse mat engem wonnerschéine Schoss uewe riets am Eck versenkt. Domadder huet de Scherhant seng staark Leeschtung mat engem Gol belount a fir déi verdéngt 1:0-Pausféierung vun den Däitsche gesuergt. Nom Säitewiessel huet Däitschland weider den Toun uginn a sech direkt e puer gutt Méiglechkeeten erausgespillt. An der 60. Minutt huet de Florian Wirtz dunn no enger flotter Eenzelaktioun mat engem präzise Schoss aus der Distanz op 2:0 erhéicht. Nëmme fënnef Minutte méi spéit huet de Nico Schlotterbeck no engem Fräistouss vum Gruda per Kapp den 3:0 markéiert an domadder fir d'Virentscheedung gesuergt. Mä d'Ekipp vum Jürgen Klopp hat nach net genuch. An der 71. Minutt huet de Wirtz no enger staarker Viraarbecht vum Gruda säin zweete Gol vum Owend geschoss, ier de Gruda sech sechs Minutte méi spéit och nach selwer an d'Lëscht vun de Goler agedroen huet. D'Hollänner hunn an der zweeter Hallschent kaum nach eng Äntwert fonnt a konnten der däitscher Offensiv wéineg entgéintsetzen. Esou huet sech Däitschland um Enn däitlech mat 5:0 géint Holland duerchgesat a sech domadder als Gruppenéischten fir d'Véierelsfinall vun der Nations League qualifizéiert. D'Hollänner zéien iwwerdeems als Gruppenzweet an dës an.

Griicheland huet sech um leschte Spilldag mat 1:0 géint Serbien duerchgesat. D'Griichen haten iwwert wäit Strecke méi vum Match, mä de serbesche Golkipp Petrović konnt e puer gutt Chancen entschäerfen. An der 69. Minutt huet de Masouras no enger Virlag vum Pavlidis schliisslech fir den entscheedende Gol gesuergt. Serbien hat kuerz viru Schluss nach d'Chance op den Ausgläich, mä dem Milenković säi Kappball ass un der Lat gelant. Trotz der Victoire schléisst Griicheland d'Gruppephas punktgläich mat Däitschland an Holland op der drëtter Plaz of a verpasst domadder d'Véierelsfinall. Serbien gëtt Véierten a muss an d'Liga B ofsteigen.

Liga B

An der Liga B huet sech d'Schwäiz doheem kloer mat 4:0 géint Schottland duerchgesat. Dobäi ass d'Nati an der 22. Minutt duerch en Eegegol vum Lewis Ferguson a Féierung gaangen. D'Schotten hunn an der éischter Hallschent wuel probéiert, fir op de Réckstand ze reagéieren, konnten hir wéineg Méiglechkeeten awer net notzen. Nom Säitewiessel hunn d'Schwäizer dunn direkt nogeluecht an den Deckel domadder op de Match gemaach. An der 47. Minutt huet de Winsley Boteli op 2:0 erhéicht, ier den Alvyn Sanches nëmme véier Minutte méi spéit mat engem schéine Schoss den 3:0 markéiert huet. Schottland huet doropshin nach eemol probéiert, zeréck an de Match ze kommen, mä de McTominay huet déi bescht Chance vun de Gäscht an der 72. Minutt knapp iwwert de Gol gesat. Um Enn sollt den Amdouni de Score an der 89. Minutt fir d'Schwäizer souguer nach eng Kéier erhéijen. Esou feiert d'Schwäiz eng kloer Victoire géint d'Schotten a festegt seng éischte Plaz am Grupp, wougéint d'Schotten d'Nations League op Plaz dräi ofschléissen.

Slowenien huet sech auswäerts mat 3:0 géint Nordmazedonien duerchgesat a sech domadder dräi Punkte geséchert. D'Gäscht sinn an der 29. Minutt duerch den Danijel Šturm a Féierung gaangen, deen no enger Virlag vum Vipotnik den 1:0 markéiert huet. Nom Säitewiessel huet Slowenien nach eng Kéier nogeluecht. An der 66. Minutt huet den David Zec, nees no Viraarbecht vum Vipotnik, op 2:0 erhéicht an domadder fir d'Virentscheedung gesuergt. Nordmazedonien konnt doropshin net méi zeréckschloen, soudatt Slowenien an der Nospillzäit duerch de Šturm souguer nach ee Gol noleeën an um Enn eng 3:0-Victoire feiere konnt. Domadder hu sech d'Slowene déi zweete Plaz am Grupp geséchert. D'Nordmazedone schléissen de Grupp dogéint mat 0 Punkten op der leschter Plaz of.

Liga C

Am Grupp 3 vun der Liga C hunn d'Färöer Inselen sech mat 1:0 géint Moldawien duerchgesat. Den decisive Gol ass dobäi schonns an der 24. Minutt duerch den Áki Samuelsen gefall. Obwuel Moldawien am weidere Verlaf méi Ballbesëtz hat, waren d'Haushären ëmmer nees geféierlech a konnten hire knappe Virsprong bis zum Schluss verdeedegen an esou iwwer d'Zäit bréngen. D'Färöer Inselen hunn domadder hir éischt Victoire vun dëser Nations-League-Campagne gefeiert a schléissen de Grupp mat aacht Punkten op der zweeter Plaz of. Moldawien gëtt mat siwe Punkten Drëtten.

Am anere Match vum Grupp hu Kasachstan an d'Slowakei sech mat engem 2:2-Gläichspill getrennt. D'Haushäre sinn duerch de Chesnokov an der 29. Minutt a Féierung gaangen, ier de Boženík kuerz nom Säitewiessel fir d'Slowaken ausgläiche konnt. Mä an der 65. Minutt huet de Vorogovskiy Kasachstan nees a Féierung bruecht, déi dës dunn eng Zäitchen hale konnten. Laang huet et also no enger Victoire fir d'Lokalekipp ausgesinn, mä an der fënnefter Minutt vun der Nospillzäit huet den agewiesselte Kaprálik nach den 2:2 fir d'Gäscht markéiert. D'Slowakei, déi schonn als Gruppegewënner an Opsteiger an d'Liga B feststoung, schléisst hir Campagne domadder mat zwielef Punkten an ouni Néierlag of. Kasachstan bleift mat dräi Punkten op der leschter Plaz.

Liga D

Am zweete Gruppe vun der Liga D uet sech Litauen mat 2:1 géint Liechtenstein duerchgesat. De Jankauskas huet d'Haushären an der 16. Minutt a Féierung bruecht, ier de Ruzgys kuerz nom Säitewiessel per Eelefmeter op 2:0 erhéicht huet. Liechtenstein huet sech awer net geschloe ginn a konnt an der 60. Minutt duerch e Fräistouss vum Aron Sele op 1:2 verkierzen. Fir den Ausgläich sollt et awer um Enn net méi duergoen, soudatt Litauen sech no 90 intensive Minutten déi dräi Punkte séchert an d'Gruppephas mat siwe Punkten op der zweeter Plaz ofschléisst. Aserbaidschan stoung schonn am Virfeld als Gruppegewënner an Opsteiger an d'Liga C fest, wärend Liechtenstein mat engem Punkt op der leschter Plaz bleift.

Am anere Match am Grupp D hu sech Gibraltar a Malta mat 1:1 getrennt. D'Gäscht aus Malta sinn an der 19. Minutt duerch de Kurt Shaw a Féierung gaangen, ier de Carlos Peliza Richards an der 81. Minutt fir Gibraltar ausgläiche konnt. Malta schléisst d'Gruppephas domadder op der éischter Plaz of a klëmmt an d'Liga C op, wärend Gibraltar sech hannert Andorra klasséiert an domadder Drëtten am Grupp gëtt.


D'Resultater vun der Nations League

Déi komplett Resultater, d'Tabellen an d'Statistike fannt Dir hei.

D'Tabelle vun der Nations League

Back to Top
CIM LOGO