Aus dem Vëlossport ass et d'Nouvelle, datt de Mats Wenzel déi nächst zwee Joer fir déi spuenesch Ekipp Caja Rural-Seguros RGA fiert. Den 23 Joer ale Coureur war an der rezenter Vuelta e puer Mol an der Echappée an hat ugangs der Saison mat der Clásica de Pascua seng éischte Course bei der Profie gewonnen.
Am Mee war de Wenzel gudden Zweete ginn am Generalklassement vun der Flèche du Sud. De Coureur, dee beim C.T Atertdaul forméiert ginn ass, ass dono fir Leopard Pro Cycling gefuer, éier säi Wee iwwer Lidl–Trek bei d'Ekipp Kern Pharma gefouert hat. Do war hien déi lescht zwee Joer ënner Kontrakt.
De Mats Wenzel war leschte Freideg bei eis am Journal du Tour an hat eis gesot, datt seng Zukunft geséchert wier, ouni awer eng Ekipp ze nennen.
Och dem Arthur Kluckers seng Zukunft ass fir weider zwee Joer geséchert. Den Zäitfuer–Spezialist bléift an der Ekipp Tudor Pro Cycling. Des Nouvelle hat d'Ekipp schonn d'lescht Woch bekannt ginn. De 27 Joer ale Coureur hat dës Saison säin nationale Championstitel an der Stroossecourse zu Mamer kënne verdeedegen. Am Sprint hat hie sech virum Mathieu Kockelmann an dem Mats Wenzel duerchgesat.
