En Dënschdeg de Moien hunn d'Organisateure vum Siren's Call déi éischt Bands an den Headliner bekannt ginn.

Op der 4. Editioun vum Siren's-Call-Festival, de 27. Juni am Gronn, ass déi brittesch Rockband "Foals" Headliner. D'Band kënnt da scho fir déi 4. Kéier op Lëtzebuerg.

Mat dobäi sinn ënnert anerem och d'Lëtzebuerger Newcomer "CHAiLD", "Charlotte Bridge", déi polnesch Pianistin "Hania Rani", "Nothing but Thieves", "Viagra Boys", "Josin" an "The Howl & The Hum".

De Michel Welter
En Dënschdeg de Moien hunn d'Organisateure vum Siren's Call déi éischt Bands an den Headliner bekannt ginn.

E Festival, deen antëscht seng Plaz fonnt huet. De Michel Welter vum Atelier:

Mir haten d'lescht Joer gesot krut, datt de Rendez-Vous fest am Agenda vun de Museks-Aficionadoen aus der Stad wier. Dat ass, mengen ech, mat dat schéinst Kompliment, wat e ka maachen, well dat ass en Zeechen, datt mer eist Publikum fonnt hunn. An dat ass mat engem Festival dat Schwéierst. Et muss een e Konzept bréngen, wat Kapp a Schwanz huet an de Leit och gefält.

Nieft dem Headliner "Foals" wäerten ënnert anerem déi polnesch Pianistin "Hania Rani", d'schwedesch post-punk Band "Viagra Boys" oder de Lëtzebuerger Newcomer "Chaild" optrieden:

Mir maachen wierklech eng Programmatioun ouni Kompromësser a genee dat, wat eis gefält. Dat spillt sech dono an der Programmatioun erëm a vläicht ass et dann och, datt mer kee ganz grousst Publikum uschwätzen a vläicht just eng Nisch, mee dofir ëm sou konsequent.

Nieft der Musek spillt awer och de kulturellen Deel eng zentral Roll um Siren's Call. Nieft engem Marché des créateurs, Workshoppen oder Performancen sinn dëst Joer och nei Elementer bäikomm:

Mir hunn dëst Joer eng "immersive sound"-Installatioun am Gaart, déi mer wäerten kuratéieren. Mir wäerten awer och en Theaterstéck bréngen. Dat ass eng Premiere an och e gewote Schrëtt, well mer net wierklech wëssen, ob et wäert funktionéieren, mee et ass awer dat, wat et spannend mécht, soss wier et jo langweileg.

Nach ass de komplette Programm net annoncéiert, dat wäert an den nächste Wochen a Méint geschéien, ma Ticketen ginn et awer schonn fir déi 4. Editioun vum Siren's Call.