Am Podcast dës Woch geet et ëm de "Lëtzebuerger Sproochatlas 1900", dee vum Zenter fir d'Lëtzbuerger Sprooch an dem Institut Grand-Ducal erausbruecht gouf.

Podpurri Episod 117 Alain Atten, Claude Schmit, Sara Martin, Nathalie Entringer

1927 ass déi éischte Kéier eng Sproochkaart zu Lëtzebuerg erauskomm. 1963 koum de Sproochatlas vum verstuerwene Professer Robert Bruch eraus. Zu deem Zäitpunkt war den Alain Atten schonn uechtert d'Land ënnerwee, fir ze notéieren, wéi verschiddenaarteg d'Leit schwätzen. 15 Joer laang huet déi Rees gedauert an elo bal 50 Joer dono, ass alles dat, wat hien deemools festgehalen huet, am "Lëtzbuerger Sproochatlas 1900" ze fannen: 618 Plazen, 600 Kaarten, 40 Symboler, 197.000 Zeechen, eng Véierelsmillioun handgemoolte rout Rondelen a blo Dräiecker, 4,5 Kilo schwéier.

De Geografieprofesser Claude Schmit huet dës Sproochkaarten op de Virlage vum Alain Atten entworf an digitaliséiert. Mat geschafft hunn och d'Linguistinne vum Zenter fir d'Lëtzebuerger Sprooch (ZLS), Sara Martin an Nathalie Entringer.

RTL

Wéi intensiv dës Aarbecht war, doriwwer schwätze déi véier mam Christiane Kremer an erziele méi iwwer Phoneetik (ouni déi een d'Kaarten net liese kann), iwwer Koinè (dat sougenannte Standard-Lëtzebuergesch), iwwer d'Schnëssen-App an iwwer d'Aarbecht un engem zweete Band.

RTL

Podpurri - mir schwätze Kultur, dat ass 3 Mol d'Woch um Radio, op RTL.lu, op RTL Play an als Podcast op Spotify an iTunes.

RTL