Vun enger Phobie schwätzt een dann, wann eng Persoun eng iwwerméisseg Angscht virun u sech ongeféierleche Saachen oder Situatiounen huet.

Dat bekanntste Beispill ass wuel definitiv d'Arachnophobie, also d'Angscht viru Spannen. Ma och wann dëst eng vun de wäitverbreetste Phobien ass, ass et awer bei wäitem net déi eenzeg. Mëttlerweil geet een an der Medezin dovunner aus, dass et ronn 600 där Phobie ginn an, dass extrem vill Mënschen dorënner méi oder manner leiden. Ënnert de Begrëff "Phobie" falen eng Panoplie un Ängschten, wéi zum Beispill viru bestëmmten Déieren, Saachen oder Situatiounen. Et gëtt praktesch kee Moment, Géigestand oder Liewewiesen, virun deem ee keng Phobie entwéckele kann.

Zu de phobesche Stéierunge gehéieren och sozial Phobien, also d'Angscht, vun anere Mënsche beuerteelt ze ginn, oder d'Agoraphobie, also der Angscht viru gréissere Mënschemassen, ëffentleche Plazen oder dem Reesen.

E kloert Zeeche vun enger Phobie ass, dass déi Betraffen net einfach eppes Bestëmmtes fäerten oder Panik kréien, mä éischter d'Konsequenzen, déi domadder verbonne sinn, wann ee sech deem aussetzt oder a Kontakt domadder kënnt.

Zum Beispill huet een net per se Angscht virun engem Lift, mä et huet een Angscht, an engem Lift agespaart ze sinn oder an deem keng Loft méi ze kréien. Et huet een och net Angscht virun Hënn, mä virun allem Angscht, vum Hond gebass ze ginn.

Déi meeschte Leit, déi esou eng Angschtstéierung hunn, wëssen an der Reegel och, dass hir Ängschte reng objektiv onbegrënnt sinn. An dach bréngen déi Leit et net fäerdeg, hir Angscht an de Grëff ze kréien an doriwwer ze stoen. Eréischt wann ee sech vun der Situatioun distanzéiert huet, fillt ee sech nees sécher. E groussen Deel vun der Zäit verbrénge Leit mat Phobien dann och domadder, déi Situatiounen z'evitéieren, an deene se hir Ängschte musse konfrontéieren. Dass esou eppes deelweis massiv an den Alldag vun de Betraffenen agräift, schéngt kloer ze sinn.

Wisou kritt een eng Phobie?

Angscht viru Saachen ze hunn, ass u sech e Reflex, deen esouwuel Mënschen, wéi och aner Déieren vun Ufank un hunn an och biologesch an am Kader vun der Evolutioun hëllefräich, jo souguer liewesnoutwenneg ass. De Fait, dass mir virun engem Léiw fortlafen, weist, dass dëse Mechanismus extrem wichteg ka si fir e Liewewiesen. Dëst passéiert iwwregens meeschtens éier mir realiséieren, dass mir a Gefor sinn, d'Gehir léisst dëst Verhalen automatesch aus. Ma Phobië sinn allerdéngs net liewesnoutwenneg, am Contraire, hënneren se an deene meeschte Fäll.

Ënnerschiddlech Ursaache kënnen dozou féieren, dass een eng Phobie entwéckelt. Eng heefeg Ursaach ass en traumatescht Erliefnis. Et ginn zum Beispill Leit, déi eng Phobie virun Etiketten hunn. Dëst ass dacks dorobber zeréckzeféieren, dass déi betraffe Leit eng Kéier an hirem Liewen e Liewensmëttel giess hunn, op deem eng Etikett war a mat ofgeschléckt gouf. Dëst ka schonn duergoen, fir eng Phobie ze entwéckelen, well een ëmmer nees un dës Situatioun erënnert gëtt. Ähnlech ass dat bei Hënn, wou een am fréien Alter eventuell eng Kéier gebass gouf. Donieft kënnen och Iwwerfuerderung oder ongeléiste Konflikter Phobien ausléisen. Och natierlech Ängschten, déi an der Kandheet net iwwerwonne goufen, kënnen am spéidere Liewen erhale bleiwen. (Däischtert, eleng sinn, Donnerwieder...)

An Zäite vum Internet kënnt et ëmmer méi heefeg vir, dass een eppes iwwert eng schlëmm Situatioun liest oder dovun héiert, fir doropshin eng Phobie z'entwéckelen. Et ginn dann och Fäll, bei deenen een d'Phobie vu sengen Elteren iwwerhëlt, well een hei virun allem als Kand ëmmer nees Panikattacken vun Erwuessenen ausgesat war.

Et gesäit een also, dass d'Situatioun selwer net de Problem ass, mä d'Virstellung, wat eventuell kéint passéieren.

Symptomer

Et fänkt meeschtens schonn am Kapp un: Et fält Betraffene schwéier, sech ze konzentréieren, well d'Angscht ëmmer nees Prioritéit am Alldag huet. Et fillt ee sech dann och onsécher a gereizt, et ass een ugespaant an et kritt een Häerzklappen. Weider Symptomer sinn en dréchene Mond, Iwwelzegkeet oder e Gefill, agëengt ze sinn. A verschiddene Fäll kéint dat Ganzt esouguer eng Drogen-oder Medikamentesucht ausléisen, fir sech berouegen ze kënnen.

Dacks kann ee Phobien awer heelen, andeems ee bewosst u sech schafft oder sech Hëllef bei enger professioneller Therapie sicht. Ob ee professionell Hëllef brauch, hänkt da virun allem dovunner of, wéi staark se engem säi Liewen am Grëff huet a wéi laang ee se schonn huet.

Verschidde Forme vu Phobien

Wéi gesot, gëtt et praktesch näischt virun deem ee keng Phobie kéint entwéckelen. Hei eng Auswiel u bekannten awer och net sou bekannte Phobien, déi medezinesch awer tatsächlech existéieren. Eng komplett Lëscht gëtt et hei!

Geleefegst Phobien

Agoraphobie - Angscht viru grousse Räim, grousse Plazen
Arachnophobie - Angscht viru Spannen
Acrophobie - Angscht virun der Héicht oder der Déift
Aviaphobie - Angscht virum Fléien
Sozial Phobie - Angscht virun anere Mënschen, Meenungen a Situatioune mat Mënschen
Emetophobie - Angscht, sech z'iwwerginn
Klaustrophobie - Angscht virun enke Reim
Mysophobie - Angscht, sech mat enger Krankheet unzestiechen
Dentophobie - Angscht virum Zänndokter
Hypochondrie - Angscht, schwéier krank ze ginn
Karzinophobie - Angscht, Kriibs ze kréien

Ongewéinlech Phobien

Ablutophobie - Angscht virum Duschen, Angscht, sech ze wäschen
Achluophobie - Angscht virun der Däischtert
Aelurophobie - Angscht viru Kazen
Aerophobie - Angscht, Loft ofzeschlécken oder generell viru Loft
Alektorophobie - Angscht virun Hénger
Agaraphobie - Angscht, ugepaakt ze ginn
Allodoxaphobie - Angscht virun enger Meenung
Amnesiphobie - Angscht virum Vergiessen
Anthrophobie - Angscht viru Blummen
Anatidaephobie - Angscht vun enger Int ugekuckt ze ginn
Arachibutyrophobie - Angscht, dass Afennossbotter um Gomm hänke bleift an ee sech dovun iwwergëtt
Aviophobie - Angscht virum Fléien
Automatonophobie - Angscht viru Poppen
Aulophobie - Angscht viru Flütten
Bacteriophobie - Angscht viru Bakterien
Caino(to)phobie - Angscht viru neie Situatiounen
Chaetophobie - Angscht virun Hoer
Clinophobie - Angscht, an d'Bett ze goen
Dikephobie - Angscht viru Gerechtegkeet
Diplopiphobie - Angscht, duebel ze gesinn
Epistemophobie - Angscht virun der Haut, déi op der Mëllech entstoe kann
Hippopotomonstrosesquippedaliophobie - Angscht viru laange Wieder
Ikonophobie - Angscht viru Biller
Kathisophobie - Angscht, sech ze sëtzen
Leukophobie - Angscht virun der Faarf Wäiss
Novercaphobie - Angscht virun der Stéifmamm
Nomatophobie - Angscht virun Nimm
Ovtophobie - Angscht virun der Zuel 8
Plutophobie - Angscht viru Räichtum
Philophobie - Angscht virun der Léift
Selenophobie - Angscht virum Mound
Scorodophobie - Angscht viru Knuewelek
Sinistrophobie - Angscht virun Saachen, déi op der lénker Säit stinn
Tetraphobie - Angscht virun der Zuel 13