De Max Fosh huet decidéiert eppes ze probéieren, wat nach kee Mënsch virun him gemaach huet: Eemol queescht duerch Lëtzebuerg, op engem Kannervëlo!

De brittesche Youtuber Max Fosh ass mat dëser Iddi komm a gouf ufanks quasi ausgelaacht, well kee sech wierklech virstelle konnt, dass hien duerch e ganzt Land kéint fueren, dat op engem klenge Vëlo mat Stëtzrieder. Natierlech ass de Choix wéinst der iwwersiichtlecher Gréisst an der Vëlos-Euphorie séier op Lëtzebuerg gefall. Queesch vu Westen an den Oste bräicht hien nëmme ronn 50 Kilometer, quasi e Kannerspill op engem Kannervëlo. Ma dass et dann awer sou ustrengend géif ginn, hat de brittesche Content-Creator wuel net geduecht.

Gesot, gemaach... De Max Fosh ass bis op déi belsch Grenz gereest, sech an engem Spillgeschäft e Vëlo mat Riedercher an e rosa Kannerhelm kaf, a lass goung et. De Plang war et vu Maarteleng aus ze starten, ronn 50 Kilometer vum Westen an den Osten duerch de Grand-Duché ze fueren, fir dann zu Bollendorf unzekommen. Leider huet hie sech fir dës Rees dee keelsten Dag aus dem Joer ausgesicht an huet och net beduecht, dass et dann dach net sou einfach ass als erwuessene Mann op engem Kannervëlo virun ze kommen.

De Video gouf scho ronn 380.000 mol gekuckt, dat no nëmmen engem Dag op Youtube (Stand: 12.01.23). De Youtuber selwer huet iwwer 1,5 Milliounen Abonnenten, gehéiert also zu de gréissere Content-Creator a Groussbritannien. Op de Max Fosh säi Challenge packt, kuckt der Iech am beschte selwer a sengem Video un!

Eis Kolleege vum RTL Today hu mam Max, deen och scho fir de Poste vum Buergermeeschter vu London kandidéiert huet, doriwwer geschwat, wéi d'Iddi entstanen ass, duerch de Grand-Duché ze fueren.

Well et schonn "en Trend op YouTube gouf, bei deem d'Leit laang Strecke gereest sinn", wollt de Max, dee gäre Saache verännert, "eppes komplett Ongëeegentes" fannen, mat deem hien dat maache kann. D'Decisioun ass op Lëtzebuerg gefall, well de Max e Land gesicht huet, dat grouss genuch war, eng Erausfuerderung duerzestellen, mä kleng genuch, fir plausibel ze sinn.

Den RTL Today huet dem Max Fosh dann och d'Fro gestallt, ob hien eng "Max Fosh Barbie Bike Biking Across the Country"-Course géing organiséieren, wéi ee vun eise Landsleit op YouTube virgeschloen huet. D'Äntwert fannt Dir am Artikel vun RTL Today!