De Joreswiessel ass eng speziell Zäit. Et gëtt zwar nach geschafft, mee vill Leit hunn d'Feierdeeg fräi oder verbrénge se am Ausland - och Dokteren.

Gläichzäiteg sinn d'Feierdeeg awer och eng notoresch schnuddeleg Zäit. Op de sëllege Chrëschtfeieren oder iwwert engem Glühwäin an der Keelt vum Chrëschtmaart kann ee gären emol eng Krankheet oprafen. Deen Ament stellt sech fir vill Leit d'Fro: A wat elo?

Prinzipiell ass fir all net-Urgence op normale Schaffdeeg den Hausdokter déi éischt Ulafstell. Op engem Feierdag ass dat awer nach emol eng aner Saach - do hunn och d'Generaliste prinzipiell fräi. Hëllef fënnt een deen Ament an eng vun den dräi Maisons médicales uechter d'Land.

D'Maisons médicales fënnt een an der Stad, um Belval an zu Ettelbréck. Ënnert der Woch si se vun 20 Auer bis Mëtternuecht op, weekends an op Feierdeeg souguer vun 8 Auer moies bis Mëtternuecht. E Rendez-vous ass hei net néideg, et kënnt een einfach dohin a waart op säin Tour.

Weider Informatiounen iwwer d'Maison médicales fannt Dir hei um Site vun der Santé.

Fir Kanner bitt den CHL iwwerdeems och eng Maison médicale pédiatrique un, déi ënnert der Woch tëscht 19 an 22 Auer op ass. Um Weekend an op Feierdeeg sinn d'Dieren hei vun 9 bis 21 Auer op.

A medezineschen Noutfäll gëllt op Feierdeeg dat nämmlecht, wéi och op all anerem Dag vum Joer: Dat ass ee Fall fir d'Urgence. Wéi ee Spidol wéini d'Garde huet, gitt Dir hei op eiser Service-Säit gewuer.

Tipps vun der Santé

Idealerweis evitéiert een et awer einfach, iwwer d'Feierdeeg krank ze ginn. Dat ass zwar méi einfach gesot wéi gemaach, mee awer kann et hëllefen, wann een op verschidde Saachen oppasst. D'Santé gëtt heizou e puer nëtzlech Tuyauen:

  • Wie krank ass, soll, wann et geet, doheem bleiwen. Esou erhëlt ee sech net nëmme selwer méi séier, mee et riskéiert een och net, aner Leit unzestiechen. Op sozial Evenementer kann een och emol verzichten. Wann d'Symptomer sech net verbesseren oder et brauch een eng Krankschreiwung fir d'Aarbecht, sollt ee bei den Dokter.
  • Och wa Covid d'Aktualitéit net méi esou bestëmmt, wéi nach virun dräi Joer, kann et een ëmmer nach krank maachen. E Covid-Schnelltest ass dohier net vu Muttwëll. De Risiko, sech unzestiechen, kann duerch d'Droe vun enger Mask reduzéiert ginn.
  • D'Impfung ass och weiderhin ee wierksaamt Mëttel géint staark Symptomer bei enger Covid-Krankheet. Persounen iwwer 65 Joer gëtt geroden, sech géint de Corona-Virus impfen ze loossen. Déi aktuell Impfrecommandatiounen vun der CSMI fannt Dir hei.